Janubiy Koreya mudofaa vaziri harbiy texnika eksporti, mudofaa va harbiy-sanoat sohalarida keng hamkorlik qilish uchun O‘zbekistonga ilk tashrifini amalga oshirdi. Bu haqda The Korean Herald xabar berdi.
“Mudofaa vaziri Li Jong Sop 31-iyuldan 3-avgustgacha ‘Markaziy Osiyodagi alohida strategik hamkor va asosiy do‘st mamlakat’ bo‘lgan O‘zbekistonga tashrif buyurishi rejalashtirilgan”, — deyiladi Janubiy Koreya Mudofaa vazirligi xabarida.
Lining O‘zbekistonga kelishi uning mamlakatga tashrif buyurgan birinchi Janubiy Koreya mudofaa vaziri bo‘lishi bilan ahamiyatlidir.
“Tashrif davomida vazir ikki davlat o‘rtasida mudofaa va qurol-yarog‘ sanoati sohasidagi hamkorlikni kengaytirishga yo‘l ochadi.
Janubiy Koreya—O‘zbekiston mudofaa sanoatini rivojlantirish konferensiyasi ham bo‘lib o‘tadi va bu O‘zbekiston bilan mudofaa sohasida strategik hamkorlik chora-tadbirlarini muhokama qilish uchun platforma yaratadi”, — deyiladi xabarda.
Li O‘zbekiston Milliy xavfsizlik kengashi kotibi Viktor Mahmudov va mudofaa vaziri Bahodir Qurbonov bilan uchrashuv o‘tkazishi rejalashtirilgan.
Mudofaa vazirlari darajasidagi ikki tomonlama uchrashuv 2015-yil aprel oyida O‘zbekiston mudofaa vaziri Qobul Berdiyev Seulga tashrif buyurib, Janubiy Koreyada ishlab chiqarilgan FA-50 yengil jangovar samolyot simulyatorini sinovdan o‘tkazganidan beri birinchisi bo‘ladi.
Janubiy Koreya va O‘zbekiston mudofaa va harbiy-sanoat sohasidagi hamkorlikni rivojlantirish borasidagi sa’y-harakatlarini davom ettirmoqda. Mudofaa sanoati sohasida hamkorlik bo‘yicha qo‘shma qo‘mita yig‘ilishlari va mudofaa siyosati bo‘yicha seminarlar o‘tkazgan.
“Ammo Janubiy Koreya hali O‘zbekistonga o‘zining asosiy qurol-yarog‘larni sezilarli darajada eksport qilgani yo‘q va hozircha faqat kichik harbiy texnika jo‘natgan”, — deyiladi xabarda.
Ikki davlat o‘rtasida ishlab chiqarilgan qurollarni eksport qilish bo‘yicha ikki tomonlama muhokamalarga qaramay, bu muzokaralar hech qanday aniq natijalarga olib kelmagan.
“Ushbu vaziyatdan kelib chiqqan holda, Lining safari O‘zbekistonda potentsial qurol savdosiga zamin yaratish va yangi bozorga kirishni maqsad qilib qo‘yadi”, — deydi anonim manba.
Ta’kidlanishicha, Janubiy Koreya FA-50 yengil jangovar samolyotlarini, shuningdek, boshqa mahalliy qurollarni, jumladan, K9 o‘ziyurar gaubitsasini eksport qilish imkoniyatlarini o‘rganmoqda.
Izoh (0)