Ukrainada prezident Vladimir Zelenskiyning hayotiga qasd qilingan taqdirda, mamlakat boshqaruvini qanday olib borish rejasi mavjud, deb yozmoqda Politico ekspertlar va ukrainalik rasmiylar bilan suhbatlarga tayanib.
Ukraina Konstitutsiyasining 112-moddasiga ko‘ra, prezidentning vakolatlari muddatidan oldin tugatilgan taqdirda, uning keyingi saylovgacha bo‘lgan vazifalarini Ukraina Oliy Radasi raisi o‘z zimmasiga oladi.
Biroq Oliy Radaning amaldagi raisi – Zelenskiyning “Xalq xizmatkori” partiyasi a’zosi Ruslan Stefanchuk ijtimoiy so‘rovlarda yuqori reytingga ega emas, unga mamlakat fuqarolarining atigi 40 foizi ishonadi, deb ta’kidlaydi Politico. U muxolifatchi qonunchilar orasida ham mashhur emas.
Ammo Zelenskiy vafot etgan taqdirda, bu muhim ahamiyat kasb etmaydi. Ukrainada nazoratni o‘z qo‘liga olishga qodir bo‘lgan “kuchli yetakchilar jamoasi bor”, deb yozadi Politico. Ushbu kollektiv organ tarkibiga vakillik funksiyalarini bajaradigan Stefanchuk, Zelenskiy ofisining rahbari Andrey Yermak, tashqi ishlar vaziri Dmitri Kuleba va mudofaa vaziri Aleksiy Reznikov kirishi mumkin.
Vladimir Zelenskiydan Rossiya uni o‘ldirishga urinishidan xavotirdami yoki yo‘qligi so‘ralganda, u bu haqda o‘ylamasligini aytdi.
“Agar men bu haqda doim o‘ylab yurganimda, o‘zimni panaga olardim, xuddi hozir bunkerdan chiqmayotgan Putin kabi. Albatta, qo‘riqchilarim buning oldini olish yo‘lini o‘ylashi kerak va bu ularning vazifasi. Bu haqda men o‘ylamayman”, — dedi Ukraina rahbari CNN telekanaliga bergan intervyusida.
Izoh (0)