Si Szinpin sirli tarzda g‘oyib bo‘lgan harbiy amaldorlarni ishdan oldi

Xitoyda mamlakat yadroviy kuchlari qo‘mondonligidagi ikki nafar yuqori martabali ofitser lavozimidan ozod etildi. Bu haqda BBC xabar berdi.

Xalq ozodlik armiyasining raketa qo‘shinlari rahbari general Li Yuchao va uning o‘rinbosari Lyu Guanbin bir necha oy davomida omma oldida ko‘rinish bermadi. 

Ularning o‘rniga avval Harbiy-dengiz floti boshlig‘i o‘rinbosari lavozimida ishlagan Van Xoubing va partiya markaziy qo‘mitasi a’zosi Syuy Sishen tayinlandi.

Yoz boshida xuddi shunday tushunarsiz tarzda mamlakat tashqi ishlar vaziri Sin Gan g‘oyib bo‘lgandi. U bir oy davomida omma oldiga chiqmagan. Bir necha hafta o‘tgach, uning o‘rniga avvalroq tashqi ishlar vaziri bo‘lgan Van I tayinlangan.

Sin Ganning iste’foga chiqish sabablari hech qachon tushuntirilmagan. Bu Xitoy harbiy rahbariyatidagi so‘nggi o‘n yillikdagi eng katta rejadan tashqari o‘zgarishlardir. Tahlilchilar armiya saflarida boshlangan “tozalash” haqida taxmin qilmoqda.

“Ushbu tozalash muhim... chunki Xitoy yadro strategiyasida o‘nlab yillardagi eng chuqur o‘zgarishlardan birini amalga oshirmoqda. Si Szinpin misli ko‘rilmagan tarzda armiya ustidan nazoratni mustahkamladi, ammo bu jarayon tugallandi, degani emas.

Si partiya safidagi korrupsiyadan hanuz xavotirda va u partiyaga mutlaq sodiqlik hali yo‘qligini ko‘rsatdi”, — deydi Nyu-Yorkdagi Osiyo jamiyati siyosati institutining tashqi siyosat va milliy xavfsizlik bo‘yicha mutaxassisi Layl Morris.

Li Yuchao va Lyu Guanbinning qayerda ekani haqida hech qanday ma’lumot yo‘q, biroq o‘tgan hafta Gonkongda joylashgan South China Morning Post nashri nomi oshkor etilmagan manbalarga tayanib, korrupsiyaga qarshi kurash komissiyasi generallar ustidan ham tergov boshlaganini aytgandi.