O‘zbekistonda bolalarni maktabga qabul qilish yoshi pasayishi mumkinmi?

O‘zbekistonda bolalarni maktabga necha yoshdan qabul qilish kerak, degan masala doimiy muhokamalarga sabab bo‘lib keladi. Bu haqda maktabgacha va maktab taʼlimi vazirining birinchi o‘rinbosari Usmon Sharifxo‘jayev 31-iyul kuni AOKAda o‘tkazilgan matbuot anjumanida maʼlum qildi, deya xabar bermoqda “Daryo” muxbiri.

Usmon Sharifxo‘jayevning aytishicha, qanday holat bo‘lishidan qatʼi nazar, maktabga qabulda aniq yosh belgilanishi zarur.

“Erta qabul qilish kerakmi yoki kech, bu mavzu doim muhokama qilinadi. Oldingi qonunchilikda bola 6–7 yoshda maktabga chiqadi, deyilgan edi. Hozirgi holatda ham bola agar o‘quv yili sentabrda bo‘lsa, 6 yosh-u 8 oylik davridan maktabga chiqishi mumkin. Agarda oldingi holatga o‘xshab mavhum norma qo‘yilsa, bu qonunchilikda qaysidir jihatdan joylardagi talqinni o‘ziga moslashga olib keladi. Yaʼni 6–7 yosh degani, 6 yosh-u 1 kun ham, 6 yosh-u 11 oy ham bo‘lishi mumkin. To‘g‘ri keladi, to‘g‘ri kelmaydi deb maktabdan psixolog tomonidan yoki qaysidir subyektiv yondashuv asosida qaror qabul qilinishi ertaga yana ota-onalar o‘rtasida norozilikka olib keladi”, — dedi vazir o‘rinbosari.

Usmon Sharifxo‘jayevning qo‘shimcha qilishicha, maktabga kirish yoshini odamlar fikriga emas, ilmiy yondashuvga asosan belgilash lozim.

“Boshlang‘ich sinf o‘qituvchilaridan bola necha yoshdan maktabga chiqishi kerak, deb so‘ralsa, turlicha javob olish mumkin. Ularning bir qismi bola 7 yoshga to‘lib maktabga chiqsa, yaxshi deydi, boshqalari necha yoshdan chiqsa ham masala yo‘q, deydi. Bu mavzuda fikrlar turlicha. Ammo bunda odamlar fikriga emas, ilmiy yondashuvga asosanlangan maʼlumotga qarash kerak. Amaldagi “Taʼlim to‘g‘risida”gi qonun 2020-yil sentyabrda Senatda maʼqullangan bo‘lsa, u 3 yil davomida yaratilib, muhokama qilingandi. Juda ko‘p mutaxassislar fikrlar bildirgan. Bu modda kiritilganda ham (yoshga doir–tahr.) ancha bahs qilingan va shu qarorga kelingan. Buni qanchalik o‘zgartirish bo‘yicha rejalarda barcha jihatlarini tushunib keyin qaror qabul qilish kerak. Qonunchilikda belgilangan normani davlat idorasi ham, fuqarolar ham bajarishi kerak”, — dedi vazir o‘rinbosari.

Maʼlumot uchun, 2020-yil sentabr oyida “Taʼlim to‘g‘risida”gi qonunga o‘zgartirish kiritilgan va 2021/2022-o‘quv yilidan boshlab o‘quvchilar birinchi sinfga 7 yoshga to‘ladigan yilda qabul qilinishi belgilangan.