Ўзбекистонда болаларни мактабга неча ёшдан қабул қилиш керак, деган масала доимий муҳокамаларга сабаб бўлиб келади. Бу ҳақда мактабгача ва мактаб таълими вазирининг биринчи ўринбосари Усмон Шарифхўжаев 31 июль куни АОКАда ўтказилган матбуот анжуманида маълум қилди, дея хабар бермоқда “Дарё” мухбири.
Усмон Шарифхўжаевнинг айтишича, қандай ҳолат бўлишидан қатъи назар, мактабга қабулда аниқ ёш белгиланиши зарур.
“Эрта қабул қилиш керакми ёки кеч, бу мавзу доим муҳокама қилинади. Олдинги қонунчиликда бола 6–7 ёшда мактабга чиқади, дейилган эди. Ҳозирги ҳолатда ҳам бола агар ўқув йили сентябрьда бўлса, 6 ёш-у 8 ойлик давридан мактабга чиқиши мумкин. Агарда олдинги ҳолатга ўхшаб мавҳум норма қўйилса, бу қонунчиликда қайсидир жиҳатдан жойлардаги талқинни ўзига мослашга олиб келади. Яъни 6–7 ёш дегани, 6 ёш-у 1 кун ҳам, 6 ёш-у 11 ой ҳам бўлиши мумкин. Тўғри келади, тўғри келмайди деб мактабдан психолог томонидан ёки қайсидир субъектив ёндашув асосида қарор қабул қилиниши эртага яна ота-оналар ўртасида норозиликка олиб келади”, — деди вазир ўринбосари.
Усмон Шарифхўжаевнинг қўшимча қилишича, мактабга кириш ёшини одамлар фикрига эмас, илмий ёндашувга асосан белгилаш лозим.
“Бошланғич синф ўқитувчиларидан бола неча ёшдан мактабга чиқиши керак, деб сўралса, турлича жавоб олиш мумкин. Уларнинг бир қисми бола 7 ёшга тўлиб мактабга чиқса, яхши дейди, бошқалари неча ёшдан чиқса ҳам масала йўқ, дейди. Бу мавзуда фикрлар турлича. Аммо бунда одамлар фикрига эмас, илмий ёндашувга асосанланган маълумотга қараш керак. Амалдаги “Таълим тўғрисида”ги қонун 2020 йил сентябрда Сенатда маъқулланган бўлса, у 3 йил давомида яратилиб, муҳокама қилинганди. Жуда кўп мутахассислар фикрлар билдирган. Бу модда киритилганда ҳам (ёшга доир–таҳр.) анча баҳс қилинган ва шу қарорга келинган. Буни қанчалик ўзгартириш бўйича режаларда барча жиҳатларини тушуниб кейин қарор қабул қилиш керак. Қонунчиликда белгиланган нормани давлат идораси ҳам, фуқаролар ҳам бажариши керак”, — деди вазир ўринбосари.
Маълумот учун, 2020 йил сентябрь ойида “Таълим тўғрисида”ги қонунга ўзгартириш киритилган ва 2021/2022-ўқув йилидан бошлаб ўқувчилар биринчи синфга 7 ёшга тўладиган йилда қабул қилиниши белгиланган.
Изоҳ (0)