“Қарши ҳужум Киев ўйлагандек натижа бермаяпти” — Песков

Россия президенти матбуот котиби Дмитрий Песков Киевнинг қарши ҳужуми муваффақиятсиз кечаётганини таъкидлади.

Шунингдек, у НАТОнинг кўп миллиард долларлик ресурслари самарасиз ва мақсадсиз сарфланаётгани, бу эса Ғарб мамлакатлари ва солиқ тўловчилари учун ноқулайлик туғдираётганини қўшимча қилди.

“Очиғи, қарши ҳужум Киевда ўйлангандек натижа бермаяпти. Бундан ташқари, НАТО давлатлари Киев режимига ўтказган кўп миллиард долларлик ресурслар аслида самарасиз, мақсадсиз сарфланаётгани ҳам кўриниб турибди”, — деди Песков журналистлар билан суҳбатда.

Украина мудофаа вазири Алексий Резников CNN телеканалига берган интервьюсида Украинанинг қарши ҳужуми графикдан ортда қолаётганини, аммо бу уни безовта қилмаслиги, чунки ҳаммаси режа бўйича кетаётганини айтиб ўтганди.

Вазир қарши ҳужумларнинг барчаси “тезкор бўлиши керак” деган янглиш фикр борлигини таъкидлаган. Унинг сўзларига кўра, ҳужум секин бормоқда, чунки “ҳаво ҳужумидан мудофаа муаммоси” бор, фронт олди чизиғи эса юзлаб километрга чўзилган.

“Рақибларимиз сони кўп. Шундай экан бу компьютер ўйини эмас, уруш”, — деган вазир интервьюда.