Yanvar–iyun oylarida O‘zbekistoning 5 ta hududida 6 nafar maktab o‘quvchisida erta homiladorlik holatlari aniqlangan. Bu haqda bugun (31-iyul) AOKAda o‘tkazilgan matbuot anjumanida maʼlum qilindi, deya xabar bermoqda “Daryo” muxbiri.
Foto: “Daryo” / Madina Nurman
Maktabgacha va maktab taʼlimi vazirligi boshqarma boshlig‘i o‘rinbosari Azamat Kamolovning aytishicha, o‘quvchilarda erta homiladorlik darsdan tashqari vaqtlarda sodir bo‘lgan.
“2023-yilning 6 oyi davomida maktab o‘quvchilari o‘rtasida 6 ta homiladorlik holatlari aniqlangan. Yaʼni Qashqadaryo viloyatida ikkita, Samarqand, Sirdaryo, Surxondaryo viloyatlari va Qoraqalpog‘istonda bittadan. Qizlarni oilaviy hayotga tayyorlash bo‘yicha ko‘p tadbirlar o‘tkaziladi. Lekin bu holatlar ko‘proq yozgi taʼtil davrida yoki maktabdan tashqari vaqtlarda sodir bo‘ladi. Ammo bu maktab masʼuliyatni zimmasiga olmaydi, degani emas. Birinchi navbatda sinf rahbarlari va ota-onalar bilan hamkorlikdagi ishlar yo‘lga qo‘yilgan. Umumta’lim maktablari o‘quvchilari o‘rtasida erta homiladorlik, erta tug‘ruqning oldini olish bo‘yicha Oila va xotin-qizlar qo‘mitasi, joylardagi mahalla faollari, mahallardagi ‘beshlik’ bilan hamkorlikda ishlar olib boriladi”,— dedi vazirlik masʼuli.
Maktabgacha va maktab taʼlimi vazirining birinchi o‘rinbosari Usmon Sharifxo‘jayevning qo‘shimcha qilishicha, bu muammo ko‘proq oilaviy tarbiya bilan bog‘liq.
“Bu masalada bolalarga ko‘proq oilada, onalar tomonidan bilim berilishi to‘g‘ri bo‘lardi”, — dedi vazir o‘rinbosari.
Izoh (0)