Январь–июнь ойларида Ўзбекистонинг 5 та ҳудудида 6 нафар мактаб ўқувчисида эрта ҳомиладорлик ҳолатлари аниқланган. Бу ҳақда бугун (31 июль) АОКАда ўтказилган матбуот анжуманида маълум қилинди, дея хабар бермоқда “Дарё” мухбири.
Фото: “Дарё” / Мадина Нурман
Мактабгача ва мактаб таълими вазирлиги бошқарма бошлиғи ўринбосари Азамат Камоловнинг айтишича, ўқувчиларда эрта ҳомиладорлик дарсдан ташқари вақтларда содир бўлган.
“2023 йилнинг 6 ойи давомида мактаб ўқувчилари ўртасида 6 та ҳомиладорлик ҳолатлари аниқланган. Яъни Қашқадарё вилоятида иккита, Самарқанд, Сирдарё, Сурхондарё вилоятлари ва Қорақалпоғистонда биттадан. Қизларни оилавий ҳаётга тайёрлаш бўйича кўп тадбирлар ўтказилади. Лекин бу ҳолатлар кўпроқ ёзги таътил даврида ёки мактабдан ташқари вақтларда содир бўлади. Аммо бу мактаб масъулиятни зиммасига олмайди, дегани эмас. Биринчи навбатда синф раҳбарлари ва ота-оналар билан ҳамкорликдаги ишлар йўлга қўйилган. Умумтаълим мактаблари ўқувчилари ўртасида эрта ҳомиладорлик, эрта туғруқнинг олдини олиш бўйича Оила ва хотин-қизлар қўмитаси, жойлардаги маҳалла фаоллари, маҳаллардаги ‘бешлик’ билан ҳамкорликда ишлар олиб борилади”,— деди вазирлик масъули.
Мактабгача ва мактаб таълими вазирининг биринчи ўринбосари Усмон Шарифхўжаевнинг қўшимча қилишича, бу муаммо кўпроқ оилавий тарбия билан боғлиқ.
“Бу масалада болаларга кўпроқ оилада, оналар томонидан билим берилиши тўғри бўларди”, — деди вазир ўринбосари.
Изоҳ (0)