Аввалроқ Фарғона шаҳрида жойлашган караокеда юз берган ёнғин оқибатида 6 нафар фуқаро ҳалок бўлгани ҳақида хабар берилганди. Бош вазир ўринбосари Очилбой Раматов бошчилигида ҳукумат комиссияси Фарғона шаҳрига етиб бориб, ўрганиш ишларини олиб борди, дея хабар берди Фавқулодда вазиятлар вазирлиги.
“Ўрганиш ишлари давомида дастлабки маълумотларга кўра, 6 нафар фуқаро ёнғиндан чиққан тутундан заҳарланиш оқибатида ҳалок бўлган. Суд-тиббий экспертизанинг дастлабки хулосаси ҳам шундай. Ҳукумат комиссиясининг иши давом этмоқда. Ҳодиса юзасидан қўшимча маълумот тақдим этилади”, — дейилади хабарда.
Президент топшириғига кўра, ҳукумат комиссияси тузилган. Қайд этилишича, жабрланганларга ССВ Республика шошилинч тиббий ёрдам илмий маркази Фарғона вилояти филиалида зарур тиббий ёрдам кўрсатилмоқда. Ҳолат юзасидан Фарғона вилояти прокуратураси томонидан жиноят иши қўзғатилган ва тергов ҳаракатлари олиб борилмоқда.
Комиссия ўз фаолиятини ёнғин ва техника хавфсизлиги, шунингдек, бахтсиз ҳодисаларни текшириш ва ҳисобга олиш тўғрисидаги қонунчилик ҳужатлари талабларига мувофиқ ташкил этади.
Комиссия бир ҳафта муддатда:
- Бахтсиз ҳодиса оқибатида вафот этганларнинг оила аъзоларига ҳамда жабрланганларга тиббий, моддий, психологик ва бошқа ёрдамлар кўрсатилишини таъминлайди.
- Шунингдек, комиссия объектда бахтсиз ҳодиса келиб чиқишига олиб келиши мумкин бўлган омилларни ҳар томонлама ўрганиб чиқади.
- Текшириш якунлари бўйича тегишли далолатномалар расмийлаштирилиб, жабрланганларга кўрсатилган ёрдамлар бўйича ҳисобот Вазирлар Маҳкамасига киритилади.
Изоҳ (0)