Qashqadaryo viloyati Nishon tumanida joylashgan “Talimarjon IES”da ikkita yangi bug‘-gaz qurilmalarini qurish boshlandi. Bu haqda Energetika vazirligi matbuot xizmati xabar berdi.
Qayd etilishicha, “Issiqlik elektr stansiyalari” AJ hamda “Talimarjon IES” AJda Ispaniyaning Intecsa Ingeniera Industrial S.A. va Yaponiyaning Mitsubishi Corporation kompaniyalari bilan 1 065 MVt quvvatga ega navbatdagi bug‘-gaz qurilmalarini qurish bo‘yicha shartnoma imzolangan.
Unga ko‘ra, 2025-yil yakuniga qadar stansiyada umumiy quvvati 1 065 MVt bo‘lgan navbatdagi ikkita bug‘-gaz qurilmalarini qurish ishlari olib boriladi. Loyihaning umumiy qiymati 771,8 million dollarga teng.
Yangi investitsiya loyihasi Samarqand va Buxoro viloyatlari iste‘molchilarini, Qarshi magistral kanalidagi yettita nasos stansiyasini ishonchli elektr energiyasi bilan ta‘minlashga qaratilgan.
Loyiha amalga oshirilishi natijasida, korxona tomonidan yiliga qo‘shimcha 8,5 milliard kVt/soat elektr energiyasi ishlab chiqariladi. Yuqori tejamkor texnologiyalar hisobiga 600 million kubmetr tabiiy gaz tejalishiga erishiladi. Atmosferaga chiqarilayotgan ifloslantiruvchi moddalar 1 500 tonnaga kamayadi hamda 112 ta yangi ish o‘rni yaratiladi.
Iyul boshlarida “Issiqlik elektr stansiyalari” rahbari Bahodir Jo‘rayev “Talimarjon IES” bo‘yicha investitsiya loyihalarini amalga oshirishda sustkashlikka yo‘l qo‘ygani uchun hayfsan olgandi.
Izoh (0)