O‘zbekiston tashqi ishlar vaziri Baxtiyor Saidov 26-iyul kuni Tojikiston tashqi ishlar vaziri Sirojiddin Muhriddin va Turkmaniston tashqi ishlar vaziri Rashid Meredov bilan videokonferensaloqa shaklida muzokaralar o‘tkazdi. Bu haqda TIV matbuot xizmati xabar berdi.
Qayd etilishicha, uchrashuvda 2023-yil avgust oyida Ashxobod shahrida bo‘lib o‘tadigan O‘zbekiston, Tojikiston va Turkmaniston prezidentlarining sammitiga tayyorgarlik ko‘rish va uni o‘tkazish masalalari muhokama qilingan.
“Vazirlar bo‘lajak yig‘ilishning dasturi loyihasi, kun tartibi, shuningdek, sammitning yakuniy hujjati loyihasini muhokama qildilar. Shu ma’noda, vazirlar mintaqaviy hamkorlikning ustuvor jihatlari yuzasidan fikr almashdilar”, — deyiladi xabarda.
O‘zbekiston prezidenti 19-iyul kuni Markaziy Osiyo mamlakatlari va Ko‘rfaz arab davlatlari hamkorlik kengashi yetakchilarining birinchi sammitida ishtirok etgandi. Davlat rahbari ushbu sammitda qator takliflarni ilgari surgan. Shuningdek, Shavkat Mirziyoyevning Tojikiston prezidenti Emomali Rahmon bilan o‘zaro kelishuviga asosan mamlakat hukumati delegatsiyasi 21-iyul kuni Tojikistonga tashrif buyurgan edi.
Izoh (0)