Niger harbiylari mamlakat prezidenti Muhammad Bazum lavozimidan chetlatilganini va bugundan boshlab mamlakat chegaralari yopilganini e’lon qildi. Bu haqda Reuters harbiylarning milliy televideniye orqali bergan bayonotiga asoslanib xabar bermoqda.
“Mamlakat chegaralari yopildi, butun mamlakat bo‘ylab komendantlik soati eʼlon qilinmoqda”, — deya harbiylarning so‘zlaridan iqtibos keltirdi agentlik.
26-iyul kuni kechqurun Bazum va uning rafiqasi o‘z qarorgohida prezident gvardiyasi tomonidan hibsga olingan edi.
Prezident gvardiyasiga general Umar Chiani boshchilik qiladi. Jeune Afrique nashri ta’kidlashicha, Bazum so‘nggi kunlarda generalni lavozimidan chetlatish haqida o‘ylagan. Chiani bu lavozimda Nigerning avvalgi prezidenti Maxamadu Issufu davridan beri ishlab keladi.
Niger armiyasi prezident gvardiyasi askarlarining isyonini qo‘llab-quvvatlamagan. Jeune Afrique nashri armiya va isyonchilar o‘rtasida mojaro chiqmasligi uchun Bazum prezident gvardiyasi bilan muzokara boshlagani haqida yozdi.
Niger G‘arbiy Afrikadagi dengizga chiqmaydigan davlatdir. Mamlakat aholisi qariyb 25 million kishini, umumiy maydoni 1,267 million kvadrat kilometrni (dunyoda 21-o‘rin) tashkil qiladi.
Muhammad Bazum 2021-yilda prezident etib saylangan. Avvalgi prezident davrida u Ichki ishlar vazirligi va Tashqi ishlar vazirligi rahbari lavozimlarida ishlagan.
Izoh (0)