Ukraina janubi Mudofaa kuchlari qarshi hujumining asosiy nishoniga aylanishi ma’lum qilindi. Bu haqda amerikalik rasmiylarga tayanib, The New York Times xabar berdi.
Ukraina armiyasi rus harbiylari o‘rnatgan mina maydonlaridan o‘tib, Zaporojye viloyatining Tokmak shahrigacha borishi kutilmoqda. Bu muvaffaqiyatli amalga oshsa, Ukraina Qurolli kuchlari Melitopolga yo‘l oladi.
Ukraina harbiylarining maqsadi Qrim va boshqa vaqtincha bosib olingan hududlar o‘rtasidagi quruqlik yo‘lagini uzish yoki hech bo‘lmaganda Ukraina artilleriyasi yarimorolga yetib borishini ta’minlashdan iborat.
Biroq iyun oyi boshida qarshi hujum boshlanganidan keyin hammasi rejadagidek bo‘lmagani aytilmoqda. Oq uy va Pentagon rasmiylari operatsiyaning kuchayishini katta qiziqish bilan kuzatayotganini bildirdi.
“Bu katta sinov”, — dedi AQSHning yuqori martabali amaldorlaridan biri.
Izoh (0)