Нигер ҳарбийлари мамлакат президенти Муҳаммад Базум лавозимидан четлатилганини ва бугундан бошлаб мамлакат чегаралари ёпилганини эълон қилди. Бу ҳақда Reuters ҳарбийларнинг миллий телевидение орқали берган баёнотига асосланиб хабар бермоқда.
“Мамлакат чегаралари ёпилди, бутун мамлакат бўйлаб комендантлик соати эълон қилинмоқда”, — дея ҳарбийларнинг сўзларидан иқтибос келтирди агентлик.
26 июль куни кечқурун Базум ва унинг рафиқаси ўз қароргоҳида президент гвардияси томонидан ҳибсга олинган эди.
Президент гвардиясига генерал Умар Чиани бошчилик қилади. Jeune Afrique нашри таъкидлашича, Базум сўнгги кунларда генерални лавозимидан четлатиш ҳақида ўйлаган. Чиани бу лавозимда Нигернинг аввалги президенти Махамаду Иссуфу давридан бери ишлаб келади.
Нигер армияси президент гвардияси аскарларининг исёнини қўллаб-қувватламаган. Jeune Afrique нашри армия ва исёнчилар ўртасида можаро чиқмаслиги учун Базум президент гвардияси билан музокара бошлагани ҳақида ёзди.
Нигер Ғарбий Африкадаги денгизга чиқмайдиган давлатдир. Мамлакат аҳолиси қарийб 25 миллион кишини, умумий майдони 1,267 миллион квадрат километрни (дунёда 21-ўрин) ташкил қилади.
Муҳаммад Базум 2021 йилда президент этиб сайланган. Аввалги президент даврида у Ички ишлар вазирлиги ва Ташқи ишлар вазирлиги раҳбари лавозимларида ишлаган.
Изоҳ (0)