Xalqaro valyuta fondi butun dunyoda iqtisodiyotning global o‘sishi 2022-yildagi taxminiy 3,5 foizdan 2023 va 2024-yillarda 3 foizga tushishini prognoz qilmoqda.
2023-yil uchun prognoz apreldagi World Economic Outlook (WEO) prognozidan biroz yuqori bo‘lsa-da, tarixiy ko‘rsatkichlar bo‘yicha zaifligicha qolmoqda. Inflyatsiyaga qarshi kurashish uchun markaziy banklar tomonidan asosiy stavkalarni oshirish siyosati iqtisodiy faollikka ta’sir qilishda davom etmoqda.
Xalqaro valyuta fondi tomonidan e’lon qilingan hisobotda Yaqin Sharq va Markaziy Osiyo mamlakatlaridagi YIM o‘sishi 2022-yildagi 5,4 foizdan 2023-yilda 2,5 foizga va 2024-yilda 3,2 foizga pasayishi prognoz qilingan.
Shuningdek, global inflyatsiya 2022-yildagi 8,7 foizdan 2023-yilda 6,8 foizga va 2024-yilda 5,2 foizga tushishi kutilmoqda.
“AQSH va Shveysariya banklaridagi tebranishlarni to‘xtatish bo‘yicha hukumatlar tomonidan joriy yil boshida amalga oshirilgan qat’iy chora-tadbirlar, AQSHning davlat qarzi chegarasi bo‘yicha yaqinda qabul qilgan qarori moliyaviy sektordagi tartibsizliklarning bevosita xatarlarini kamaytirdi”, — deyiladi XVF hisobotida.
Bu prognoz uchun o‘rtacha salbiy xavf. Biroq global o‘sish uchun xavflar muvozanati past tomonga yo‘nalgan holda qolmoqda. Agar keyingi iqtisodiy tebranishlar, jumladan, Ukrainadagi urushning kuchayishi va ekstremal ob-havoning davom etishi ro‘y bersa, inflyatsiya yuqoriligicha qolishi va hatto ko‘tarilishi mumkin, bu esa yanada cheklovchi pul-kredit siyosatini yuritishga olib keladi, deb hisoblaydi XVF ekspertlari.
Izoh (0)