Xitoy parlamenti bir oy davomida jamoatchilikka ko‘rinish bermagan tashqi ishlar vaziri Sin Ganni lavozimidan chetlashtirdi. Bu haqda Sinxua xabar berdi.
Sin Gan o‘rnini Xitoy Markaziy qo‘mitasi tashqi ishlar komissiyasi rahbari Van I egallaydi. U 2013-yildan 2022-yilgacha tashqi ishlar vaziri lavozimida ishlagan.
“Ovoz berish natijasida Sin Ganni XXR tashqi ishlar vaziri lavozimidan chetlashtirish va Van Ini tashqi ishlar vaziri etib tayinlash to‘g‘risida qaror qabul qilindi”, — deyiladi parlament hujjatida.
Xitoy tashqi ishlar vaziri g‘oyib bo‘lgani haqidagi xabarlar Sin Gan 11—15-iyul kunlari Jakartada bo‘lib o‘tgan Janubi-sharqiy Osiyo davlatlari assotsiatsiyasi (ASEAN) tashqi ishlar vazirlari yig‘ilishida qatnashmagach tarqaldi. Vazirlik Sin Gan “sog‘lig‘i sababli” qatnasha olmasligini bildirdi. Uning o‘rniga tadbirda Van I ishtirok etdi.
Shundan so‘ng Xitoy tashqi ishlar vazirining jamoatchilikka ko‘rinish bermayotgani mavzusi G‘arb matbuotida aylana boshladi.
O‘shandan beri Xitoy tashqi ishlar vazirining qayerdaligi va sog‘lig‘i haqida boshqa ma’lumot bermadi, garchi jurnalistlar brifinglarda bu bo‘yicha bir necha bor savollar bergan.
Sin Ganning ish faoliyati
Sin Gan 1966-yil mart oyida Tyanszinda tug‘ilgan. 1988-yildan buyon turli diplomatik lavozimlarda ishlagan.
- 2010—2011-yillarda Xitoyning Buyuk Britaniya va Shimoliy Irlandiya Birlashgan Qirolligidagi elchixonasiga rahbarlik qilgan.
- 2018—2021-yillarda XXR tashqi ishlar vaziri o‘rinbosari lavozimida faoliyat olib borgan.
- 2021-yil iyul oyidan buyon Xitoyning AQSHdagi favqulodda va muxtor elchisi lavozimida ishlab kelgan.
- Sin Gan 2022-yil 30-dekabrda Xitoy tashqi ishlar vaziri lavozimini egallagandi.
Izoh (0)