Хитой парламенти бир ой давомида жамоатчиликка кўриниш бермаган ташқи ишлар вазири Син Ганни лавозимидан четлаштирди. Бу ҳақда Sinxua хабар берди.
Син Ган ўрнини Хитой Марказий қўмитаси ташқи ишлар комиссияси раҳбари Ван И эгаллайди. У 2013 йилдан 2022 йилгача ташқи ишлар вазири лавозимида ишлаган.
“Овоз бериш натижасида Син Ганни ХХР ташқи ишлар вазири лавозимидан четлаштириш ва Ван Ини ташқи ишлар вазири этиб тайинлаш тўғрисида қарор қабул қилинди”, — дейилади парламент ҳужжатида.
Хитой ташқи ишлар вазири ғойиб бўлгани ҳақидаги хабарлар Син Ган 11—15 июль кунлари Жакартада бўлиб ўтган Жануби-шарқий Осиё давлатлари ассоциацияси (ASEAN) ташқи ишлар вазирлари йиғилишида қатнашмагач тарқалди. Вазирлик Син Ган “соғлиғи сабабли” қатнаша олмаслигини билдирди. Унинг ўрнига тадбирда Ван И иштирок этди.
Шундан сўнг Хитой ташқи ишлар вазирининг жамоатчиликка кўриниш бермаётгани мавзуси Ғарб матбуотида айлана бошлади.
Ўшандан бери Хитой ташқи ишлар вазирининг қаердалиги ва соғлиғи ҳақида бошқа маълумот бермади, гарчи журналистлар брифингларда бу бўйича бир неча бор саволлар берган.
Син Ганнинг иш фаолияти
Син Ган 1966 йил март ойида Тянсзинда туғилган. 1988 йилдан буён турли дипломатик лавозимларда ишлаган.
- 2010—2011 йилларда Хитойнинг Буюк Британия ва Шимолий Ирландия Бирлашган Қироллигидаги элчихонасига раҳбарлик қилган.
- 2018—2021 йилларда ХХР ташқи ишлар вазири ўринбосари лавозимида фаолият олиб борган.
- 2021 йил июль ойидан буён Хитойнинг АҚШдаги фавқулодда ва мухтор элчиси лавозимида ишлаб келган.
- Син Ган 2022 йил 30 декабрда Хитой ташқи ишлар вазири лавозимини эгаллаганди.
Изоҳ (0)