Turkiyada bir necha zilzila sodir bo‘ldi. Bu haqda Yevropa O‘rta Yer dengizi seysmologiya markaziga tayanib, Tengrinews xabar berdi.
25-iyul kuni ertalab Turkiya janubidagi Adana viloyatining Kozan tumanida 5,5 magnitudali zilzila sodir bo‘ldi. Yer silkinishlari mahalliy vaqt bilan 08:44 da kuzatilgan. Zilzila o‘chog‘i 12 kilometr chuqurlikda joylashgan.
Ikki soatdan keyin Kozanda seysmologlar 3,8 magnitudali yangi zilzilani qayd etdi. Uning o‘chog‘i 5 kilometr chuqurlikda joylashgan.
Xuddi shu hududda yana bir 4,6 magnitudali zilzila mahalliy vaqt bilan soat 10:57 da yuz berdi. Qurbonlar haqida ma’lumot berilmagan. Ehtimoliy zarar haqida xabarlar paydo bo‘lmagan.
Eslatib o‘tamiz, 6-fevral kuni Turkiyaning janubi-sharqida magnitudasi yetti balldan ortiq bo‘lgan ikkita zilzila sodir bo‘lgandi (mahalliy vaqt bilan soat 04:17 da – 7,7 ball va 13:24 da – 7,6 ball). Kuchli silkinishlar qo‘shni davlatlar, jumladan, Suriya, Livan, Kipr va Iroqda ham sezilgan. Turkiyadagi zilzila qurbonlari soni 50 mingdan oshgan.
Izoh (0)