Isroil Knesseti (parlamenti) 24-iyul kuni sud-huquq islohoti doirasidagi birinchi qonunni ma’qulladi, deb xabar bermoqda The Jerusalem Post. Bu islohot bir necha oydan beri noroziliklarga sabab bo‘lmoqda. Muxolifat Knessetda ovoz berishni boykot qildi.
Qabul qilingan qonun hukumatning har qanday qarorini bloklash huquqiga ega bo‘lgan Isroil Oliy sudining vakolatlarini cheklaydi. Sud-huquq islohotining asosiy va eng munozarali elementlaridan biri ham shu.
Parlament qaroridan keyin Isroilning turli joylarida norozilik namoyishlari boshlandi. Politsiyaning dastlabki hisobotiga ko‘ra, Quddusda 19 namoyishchi qo‘lga olingan. Shu bilan birga, Isroil tibbiyot assotsiatsiyasi 25-iyul kuni ish tashlash e’lon qildi, bu esa shifoxonalar faoliyatini minimal darajaga tushiradi.
Haaretz xabariga ko‘ra, Isroilning markaziy hududida mashina namoyishchilar ustiga borib, ularning bir nechtasini urib yuborgan. Turli manbalarga ko‘ra, ikki-uch namoyishchi yaralangan, ularning jarohatlari yengil. Jabrlanganlardan birining so‘zlariga ko‘ra, “bu ataylab qilingan hujum edi”.
Isroilda sud-huquq islohotlariga qarshi ommaviy norozilik namoyishlari bir necha oydan beri davom etmoqda. Ayrim namoyishlar politsiya bilan to‘qnashuvlarga aylangan. 27-mart kuni Isroil bosh vaziri Binyamin Netanyaxu sud-huquq islohoti vaqtincha to‘xtatilishini e’lon qildi, ammo keyinroq rasmiylar bu masala muhokamasiga qaytdi.
Izoh (0)