Исроил Кнессети (парламенти) 24 июль куни суд-ҳуқуқ ислоҳоти доирасидаги биринчи қонунни маъқуллади, деб хабар бермоқда The Jerusalem Post. Бу ислоҳот бир неча ойдан бери норозиликларга сабаб бўлмоқда. Мухолифат Кнессетда овоз беришни бойкот қилди.
Қабул қилинган қонун ҳукуматнинг ҳар қандай қарорини блоклаш ҳуқуқига эга бўлган Исроил Олий судининг ваколатларини чеклайди. Суд-ҳуқуқ ислоҳотининг асосий ва энг мунозарали элементларидан бири ҳам шу.
Парламент қароридан кейин Исроилнинг турли жойларида норозилик намойишлари бошланди. Полициянинг дастлабки ҳисоботига кўра, Қуддусда 19 намойишчи қўлга олинган. Шу билан бирга, Исроил тиббиёт ассоциацияси 25 июль куни иш ташлаш эълон қилди, бу эса шифохоналар фаолиятини минимал даражага туширади.
Haaretz хабарига кўра, Исроилнинг марказий ҳудудида машина намойишчилар устига бориб, уларнинг бир нечтасини уриб юборган. Турли манбаларга кўра, икки-уч намойишчи яраланган, уларнинг жароҳатлари енгил. Жабрланганлардан бирининг сўзларига кўра, “бу атайлаб қилинган ҳужум эди”.
Исроилда суд-ҳуқуқ ислоҳотларига қарши оммавий норозилик намойишлари бир неча ойдан бери давом этмоқда. Айрим намойишлар полиция билан тўқнашувларга айланган. 27 март куни Исроил бош вазири Биньямин Нетаньяху суд-ҳуқуқ ислоҳоти вақтинча тўхтатилишини эълон қилди, аммо кейинроқ расмийлар бу масала муҳокамасига қайтди.
Изоҳ (0)