O‘zbekiston prezidenti Shavkat Mirziyoyev bugun, 24-iyul kuni 66 yoshga to‘ldi. Shu munosabat bilan davlat rahbari qo‘shni hamda hamkor davlatlar prezidentlaridan tabriklarni qabul qilmoqda.
Xususan, Turkmaniston prezidenti Serdar Berdimuhamedov bilan 24-iyul kuni o‘tkazilgan telefon orqali muloqotida O‘zbekiston—Turkmaniston amaliy hamkorligini yanada rivojlantirish masalalari muhokama qilingan. Turkmaniston prezidenti O‘zbekiston rahbarini tavallud kuni bilan dildan qutlab, unga mustahkam sog‘lik va katta muvaffaqiyatlar, qardosh O‘zbekiston xalqiga farovonlik va ravnaq tiladi.
Shuningdek, suhbat davomida “Shovot—Toshovuz” chegaraoldi erkin savdo zonasini barpo etish bo‘yicha birgalikdagi ishlarning ilk natijalari katta mamnuniyat bilan qayd etildi.
Tojikiston prezidenti Emomali Rahmon bilan bo‘lib o‘tgan telefon muloqotida ham qo‘shni davlat rahbari Shavkat Mirziyoyevni tug‘ilgan kuni bilan samimiy tabrikladi.
O‘zaro muloqot davomida bo‘lajak oliy darajadagi tadbirlarga tayyorgarlik ko‘rish hamda ikki tomonlama munosabatlar kun tartibini aniq amaliy mazmun bilan boyitish masalalari muhokama qilindi.
Yetakchilar ishbilarmonlik va gumanitar aloqalarni yanada faollashtirish, jumladan, qo‘shma ko‘rgazma va yarmarkalar o‘tkazish, yoshlarni keng jalb qilgan holda madaniy va sport tadbirlarini uyushtirish muhimligi haqida yakdil fikr bildirgan. Mintaqaviy sheriklik, shu jumladan Markaziy Osiyo davlatlari rahbarlarining muntazam maslahat uchrashuvlari va Orolni qutqarish xalqaro fondi doirasidagi hamkorlikka oid masalalar ham ko‘rib chiqildi.
Shavkat Mirziyoyev Qirg‘iziston prezidenti Sadir Japarov bilan ham telefon orqali muloqot qildi. Qirg‘iziston yetakchisi O‘zbekiston rahbarini tavallud kuni bilan samimiy tabriklab, tinchlik-osoyishtalik, ravnaq va barqaror taraqqiyot tiladi.
Suhbatda O‘zbekiston bilan Qirg‘iziston o‘rtasidagi yaxshi qo‘shnichilik va keng qamrovli strategik sheriklik munosabatlarini yanada mustahkamlashning dolzarb masalalari ko‘rib chiqildi. Hukumatlararo komissiya faoliyati doirasida yangi savdo va investitsiya loyihalari to‘plamini tayyorlashga alohida eʼtibor qaratilgan. O‘zbekiston va Qirg‘iziston yetakchilari bo‘lajak oliy darajadagi tadbirlar rejasini ham ko‘rib chiqdi.
Qozog‘iston prezidenti Qasim-Jo‘mart To‘qayev bilan bo‘lib o‘tgan telefon muloqotida Qozog‘iston yetakchisi Shavkat Mirziyoyevni tavallud kuni bilan samimiy tabriklab, mustahkam sog‘lik, farovonlik va yangi muvaffaqiyatlar, qardosh O‘zbekiston xalqiga tinchlik-osoyishtalik va ravnaq tiladi.
Yetakchilar yaxshi qo‘shnichilik, strategik sheriklik va ittifoqchilik munosabatlarini yanada kengaytirish va mustahkamlash masalalarini atroflicha ko‘rib chiqdi. Hukumatlararo komissiyaning Toshkent shahrida va qo‘shma Ishchi guruhning Ostona shahrida o‘tgan navbatdagi yig‘ilishlarining samarali natijalari mamnuniyat bilan qayd etildi.
Shavkat Mirziyoyev va Ozarboyjon prezidenti Ilhom Aliyevning 24-iyul kuni o‘tgan telefon orqali muloqotida ikki tomonlama hamkorlikni yanada rivojlantirish, kooperatsiya loyihalarini ilgari surish va o‘zaro savdoni ko‘paytirish masalalari diqqat markazida bo‘ldi.
Ozarboyjon yetakchisi davlatimiz rahbarini tavallud kuni bilan dildan qutlab, mustahkam sog‘lik va katta muvaffaqiyatlar, ko‘p millatli O‘zbekiston xalqiga tinchlik-osoyishtalik, farovonlik va ravnaq tiladi.
O‘zbekiston Respublikasi hukumat delegatsiyasi o‘tgan hafta Ozarboyjonga amalga oshirgan tashrifning samarali yakunlari hamda qo‘shma Hukumatlararo komissiyaning Shusha shahrida o‘tkazilgan navbatdagi yig‘ilishi natijalari mamnuniyat bilan qayd etildi. Bo‘lajak oliy darajadagi sammitga qadar qatʼiy kelishuv va bitimlar to‘plamini shakllantirish muhimligi taʼkidlandi.
Bundan tashqari, Shavkat Mirziyoyevning Rossiya prezidenti Vladimir Putin bilan 24-iyul kuni bo‘lib o‘tgan telefon orqali muloqotida ikki tomonlama munosabatlar kun tartibidagi dolzarb masalalar muhokama qilindi.
Suhbat avvalida Rossiya yetakchisi davlat rahbarini tavallud kuni bilan samimiy tabriklab, unga mustahkam sog‘lik, baxt-saodat, O‘zbekistonning barqaror taraqqiyoti va ravnaqi yo‘lidagi faoliyatida muvaffaqiyatlar tiladi.
Davlat rahbarlari o‘zaro manfaatli savdo-iqtisodiy va investitsiyaviy hamkorlikni yanada kengaytirish, tovar ayirboshlash surʼatini taʼminlash va sanoat kooperatsiyasi bo‘yicha muhim loyihalarni ilgari surish masalalarini muhokama qildi. Mintaqaviy kun tartibidagi dolzarb masalalar yuzasidan fikr almashildi.
Oldinroq Turkman xalqining milliy yetakchisi, Turkmaniston Xalq Maslahati raisi Gurbanguli Berdimuhamedov bilan telefon orqali muloqot qilgani to‘g‘risida xabar berilgandi.
Izoh (0)