Rossiyaning Volgograd shahrida o‘zbekistonlik migrantlar Ukrainadagi urushga chaqirila boshlandi. Fuqarolar jamoat transporti salonlarida noodatiy plakatlarni payqadi. Bu haqda v1.ru xabar berdi.
Bir vaqtning o‘zida bir nechta Volgograd avtobuslarida Rossiya Qurolli kuchlariga xizmatga qabul qilish to‘g‘risidagi e’lonlar paydo bo‘lgan. Ayni damda 21 va 35-avtobus yo‘nalishlarida tashviqot e’lonlari kuzatilgan. Jamoat transporti oynasiga yopishtirilgan A4 formatdagi oq va qora varaqlarda harbiy shartnoma shartlari yozilgan.
Oyiga 200 ming rubl (taxminan ikki ming dollardan oshadi) va’da qilingan daromaddan tashqari, xizmatga borishni istaganlar Rossiya fuqaroligini soddalashtirilgan tartibda olishi eslatib o‘tiladi. Biroq yo‘lovchilar e’tiborini yuqori maosh emas, balki chaqiruvning o‘ng tomonida o‘zbekcha nusxasi berilgani e’tiborni tortgan.
Ruscha va o‘zbekcha matnlar miqdori teng bo‘lishiga qaramay, chaqiruv matnida bir nafar harbiy xizmatchi aks etgan. U slavyan millatiga mansub. Konduktorlar e’lonlarning kelib chiqishi haqidagi savollarga javob bera olmagan.
“Biz bu haqda bilmaymiz. Kechasi reklama yopishtirishadi. Bu plakatlar ikki haftadan beri turibdi”, — deydi transport kompaniyasi xodimlari.
Ochiq manbalarga ko‘ra, 21-sonli avtobus yo‘nalishi “Volgograd avtobus parki” MChJ tomonidan amalga oshiriladi.
Sirli varaqalar haqidagi savolni eshitgan kompaniya xodimlari darhol muxbirlarni ma’lum bir “VEST-SERVIS” MChJga yo‘naltirgan. E’lonlar qayerdan paydo bo‘lgani haqidagi savolga Volgograd punkti oydinlik kiritgan.
“Bu avtobuslardan xorij fuqarolari foydalanadi. Bu reklama ular uchun. Reklamani joylashtirdik va o‘zbek tilidan boshlashga qaror qildik. Kelgusida tashviqot ishlarini boshqa tillarda: tojik, qozoq va hokazolarda olib borish rejalashtirilgan. Hozircha bunday e’lonlarni avtobuslardan boshqa joyga qo‘yish buyrug‘i bo‘lmagan”, — deyiladi munosabatda.
O‘zbekiston fuqarolariga chet davlatlarining harbiy xizmatiga yollanish qonunan taqiqlanadi!
O‘zbekiston fuqarolari chet davlatlarning (shu jumladan, Rossiyaning) harbiy xizmatiga, xavfsizlik, politsiya, harbiy adliya organlari yoki shunga o‘xshash boshqa organlariga xizmatga kirish, yollangani uchun O‘zbekiston Jinoyat kodeksining 154,1-moddasiga ko‘ra 3 yildan 5 yilgacha ozodlikni cheklash yoki ozodlikdan mahrum qilish bilan jazolanadi.
Bundan tashqari, yollanish uchun ham Jinoyat kodeksining 154-moddasida javobgarlik belgilangan. Unga ko‘ra, yollanma askar bo‘lganlar 7 yildan 12 yilgacha ozodlikdan mahrum etiladi. Bunday javobgarlik boshqa davlatlar (xususan, qo‘shni davlatning) Jinoyat kodekslarida ham belgilangan.
Masalan, Tojikiston Jinoyat kodeksining 401,1-moddasiga ko‘ra 12 yildan 20 yilgacha qamoq jazosi, Qirg‘iziston Jinoyat kodeksining 416-moddasiga ko‘ra 7 yildan 15 yilgacha qamoq jazosi, Qozog‘iston Jinoyat kodeksining 162,1-moddasiga ko‘ra esa 7 yilgacha ozodlikdan mahrum etish jazosi nazarda tutilgan. O‘zbekiston fuqarolari faqat O‘zbekiston armiyasida xizmat o‘tashlari mumkin.
Izoh (0)