Samarqandda Fransiya alyansi filialini ochish imkoniyatlari muhokama qilindi. Bu haqda Senat matbuot xizmati xabar berdi.
Ushbu masala Tanzila Norboyeva boshchiligidagi O‘zbekiston delegatsiyasining Fransiyaga tashrifi chog‘ida mamlakat TIV bosh kotibi A.Dekot bilan uchrashuvda ko‘rib chiqilgan.
Suhbat davomida tomonlar so‘nggi yillarda Fransiya va O‘zbekiston o‘rtasida faol siyosiy muloqot o‘rnatilganini, ikki tomonlama munosabatlar esa mutlaqo yangicha mazmun kasb etganini ta’kidlagan.
“Shu munosabat bilan tomonlar Samarqandda o‘zbek yoshlari salohiyatini oshirishga xizmat qiladigan Fransiya alyansi filialini ochish imkoniyatlarini muhokama qildilar. Qayd etilganidek, fransiyalik mutaxassislar tomonidan O‘zbekistonda fransuz tilini o‘qitishni takomillashtirish bo‘yicha o‘quv dasturlari ishlab chiqilgan”, — deyiladi xabarda.
2023-yilning boshlarida O‘zbekiston Tashqi ishlar vazirligida Fransiyaning O‘zbekistondagi elchisi Oreliya Bushez bilan bo‘lib o‘tgan uchrashuvda ham Samarqandda Fransuz alyansini ochish bo‘yicha o‘zaro fikr almashilgandi.
Shavkat Mirziyoyev 2021-yilda o‘tkazilgan yig‘ilishda “Chet tillarini o‘qitishda nodavlat ta’lim muassasalari va Britaniya kengashi, Gyote instituti, Fransuz alyansi, KOIKA, JAYKA, Konfutsiy instituti kabi xorijiy sheriklar bilan hamkorlikni yanada kuchaytirish zarur”ligini ta’kidlagandi.
Izoh (0)