Farg‘ona viloyati Rishton tumanida oliy o‘quv yurtiga joylashtirishni va’da qilib, 3 ming dollar pullarini qo‘lga kiritgan shaxsga jinoyat ishi qo‘zg‘atildi. Bu haqda viloyat IIB axborot xizmati xabar berdi.
Ma’lum qilinishicha, 2023-yilning iyun oyida Q.R. tanishi T.N. ismli ayol ishonchiga kirib, o‘qishini O‘sh viloyatida joylashgan oliy ta’lim muassasasidan O‘zbekistonda joylashgan oliy o‘quv yurtlaridan biriga o‘zining tanishlari orqali o‘tkazib qo‘yishni va’da qilgan. U o‘z xizmati evaziga 3 ming AQSH dollarini firibgarlik yo‘li bilan qo‘lga kiritgan.
Mazkur holat yuzasidan Rishton tumani IIB huzuridagi tergov bo‘linmasi tomonidan Jinoyat kodeksining 168-moddasi 2-qismi “a” bandi (firibgarlik) bilan jinoyat ishi qo‘zg‘atilgan. Mazkur jinoyatni sodir etgan shaxs besh yilgacha ozodlikdan mahrum qilish bilan jazolanishi mumkin.
Yanvar oyida Bosh prokuratura huzuridagi departament Buxoro va Farg‘ona viloyatlarida o‘qishni ko‘chirib berish bilan firibgarlik holatlariga chek qo‘ygandi. Kuni kecha esa O‘zbekistonning qator hududlarida o‘qishga kiritib qo‘yish uchun pul olgan OTM xodimlari qo‘lga tushgani to‘g‘risida xabar berildi.
O‘qishni ko‘chirish tartibi
Vazirlar Mahkamasining 2017-yildagi 393-son qaroriga muvofiq, 15-iyuldan OTMlarda o‘qishni ko‘chirish jarayonlari boshlangan.
O‘qishni ko‘chirish uchun arizalar 5-avgustga qadar quyidagi ikkita platforma orqali qabul qilinadi:
- “Transfer.edu.uz” — davlat OTMning biridan boshqasiga;
- “My.uzbmb.uz” — xorijiy mamlakatlarda yoki respublikada faoliyat yuritayotgan xorijiy va nodavlat OTMdan davlat OTMlariga.
Izoh (0)