Toshkent shahar bojxona boshqarmasi “Toshkent-tovar” bojxona postida navbatdagi huquqbuzarlik holati fosh etildi, deb xabar beradi Davlat bojxona qo‘mitasi matbuot xizmati.
Ma’lum qilinishicha, xorijdan 2 ta yuk avtotransport vositasida keltirilgan, qiymati 50 ming dollarlik hujjatlarga ko‘ra 75 dona uch g‘ildirakli elektrovelosipedlar ularga tegishli yuk hujjatlari bilan o‘zaro solishtirilgan holda belgilangan tartibda bojxona ko‘rigidan o‘tkazilgan.
Ko‘rik davomida transport vositalarida uch g‘ildirakli elektrovelosipedlar umuman yo‘qligi, ularning o‘rniga yig‘ilmagan holatdagi uch g‘ildirakli yuk elektromototsikllari ortilgani maʼlum bo‘lgan.
Dastlabki hisob-kitoblarga ko‘ra, transport vositalariga ortilgan mazkur uch g‘ildirakli yuk elektromototsikllarning taxminiy qiymati 1 milliard 350 million so‘mni tashkil etmoqda.
Hozirda tovarlar vaqtincha saqlovga olinib, holat yuzasidan tekshiruv va surishtiruv harakatlari olib borilmoqda.
Mart oyida O‘zbekiston hududiga Rossiyadan noqonuniy qurol olib o‘tish bilan bog‘liq holatlarga chek qo‘yilgani, Toshkent aeroportida yo‘lovchining regbi koptogiga gashish yashirilgani, Namanganda madaniy merosga oid kitoblar xorijga olib ketilishining oldi olingani to‘g‘risida xabar berilgandi.
Izoh (0)