Ijtimoiy tarmoqlarda ichki ishlar xodimining maktabgacha taʼlim muassasasida bir guruh tarbiyalanuvchi bolalarga nasihat qilayotgani aks etgan video tarqalgani to‘g‘risida xabar berilgandi. Toshkent shahar maktabgacha va maktab ta’limi boshqarmasi holatga munosabat bildirdi.
Maʼlum qilinishicha, 17-iyul kuni Uchtepa tumanidagi davlat maktabgacha taʼlim tashkiloti rahbari tomonidan tuman IIO FMB, mudofaa ishlari bo‘limi hamda “Farhod” mahalla fuqarolar yig‘ini raisi nomiga hamkorlikda “Harbiylar bilan uchrashuv” mavzusida profilaktik tadbir o‘tkazish yuzasidan taklifnoma yuborilgan.
Profilaktika inspektorlari bog‘cha tarbiyalanuvchilariga Vatanga muhabbat, ota-ona qadri va kelajakda vatanni qo‘riqlaydigan mard o‘g‘lon va qizlar bo‘lib yetishishlari, bog‘chadan notanish fuqarolar bilan ketmasligi, uyini begona shaxslarga ochmaslik haqida suhbat o‘tkazib, o‘zlari bilan olib kelgan kitob va o‘yinchoqlarni bog‘cha tarbiyalanuvchilariga sovg‘a qilishgan.
Tadbir tafsilotlari aks etgan video guruh tarbiyachisi tarbiyalanuvchilar ota-onalarini jamlagan Telegram guruhiga tashlab bergan. “Afsuski, ayrim ota-onalar tomonidan bu video lavha boshqa guruhlarga tashlanib, tomoshabinlar tomonidan noto‘g‘ri talqin qilinganligi achinarlidir”, — deyiladi xabarda.
“Hurmatli davlat maktabgacha taʼlim tashkilotlari direktorlari! Toshkent shahar maktabgacha va maktab taʼlim boshqarmasi sizlardan bu kabi tadbirlarni aniq belgilangan dastur va reja asosida bolajonlar uchun qiziqarli o‘tishini taʼminlashlarini so‘raydi. Bundan tashqari, taʼlim muassasasi hududiga begonalar kirmasligini taʼminlashingiz lozimligini yana bir bor eslatib o‘tamiz.
Shuningdek, ijtimoiy tarmoq mualliflari voqelikka chuqurroq yondashsalar ayni muddao bo‘lardi. Chunki, farzandlarimiz xavfsizligi, ularning salomatligi barchamiz uchun birdek muhim deb bilamiz”, — deyiladi munosabatda.
2022-yil sentabrda Toshkent shahar Mirzo Ulug‘bek tumanida joylashgan 142-sonli maktabda ichki ishlar organlari xodimlari, maktab ma’muriyati hamda o‘quvchilar o‘rtasida o‘tkazilayotgan profilaktik suhbat jarayoni aks etgan video va fotosurat tarqalib, keng muhokamalarga sabab bo‘lgandi.
Izoh (0)