Oliy Majlis Qonunchilik palatasi binosi yonidagi tartibga solinmagan piyodalar o‘tish yo‘lida yo‘l-transport hodisasi sodir bo‘ldi. Bu haqda IIV YHXX axborot xizmati xabar berdi.
Ma’lum qilinishicha, 21-iyul kuni soat 19:00 larda Chilonzor tumani Bunyodkor shoh ko‘chasida haydovchi Lacetti rusumli avtomashinasini boshqarib kelayotib, o‘zidan oldinda ketayotgan Damas rusumli avtomashinasi bilan to‘qnashuv sodir etgan.
To‘qnashuv zarbidan so‘ng Damas avtomashinasi tartibga solinmagan piyodalar o‘tish joyida yo‘lni kesib o‘tayotgan piyodani urib yuborgan. YTH natijasida tan jarohat olib shifoxonaga yotqizilganlar haqida ma’lumot kelib tushmagan.
Holat yuzasidan Toshkent shahar IIBB YHXB mas’ul xodimlari tomonidan surishtiruv ishlari olib borilmoqda.
“Haydovchilardan avtomashina boshqarish davomida tartibga solinmagan piyodalar o‘tish joylariga yaqinlashganda tezlikni pasaytirishlarini va piyodalarga to‘xtab yo‘l berib, o‘tkazib yuborishlarini, oraliq masofa saqlab harakatlanishlarini so‘rab qolamiz”, — deyiladi xabarda.
Rossiyalik taniqli urbanist Arkadiy Gershman 2022-yil aprelida Oliy Majlis qonunchilik palatasi yonidagi ushbu yo‘lni tanqid qilgandi. “Toshkent markazidagi piyodalar o‘tish yo‘li. Bu yerda taxminan 20 ta polosa bor: asosiysi 4+4 va qo‘shimcha 5+3+3. Tabiiyki, svetofor yo‘q. E’tibor berilsa, haydovchilar odamlarni o‘tkazib yuborishda ‘avariyka’ni yoqayotganini ko‘rish mumkin — bu qiziqarli mahalliy odatga aylangan”, — deb yozgandi u.
Shuningdek, mutaxassis Toshkentda o‘tkazilgan matbuot anjumanida tartibga solinmagan piyodalar o‘tish joyi — ular faqat bitta chiziqli harakatda qo‘llanishi mumkinligi, ikki va undan ortiq chiziqli yo‘llarda svetoforlar bo‘lishi shartligini aytgandi.
Izoh (0)