Zayed Xon Bollivudda unchalik muvaffaqiyatga erisha olmadi va aktyor anchadan buyon ommaviy axborot vositalarida tilga olinmayapti. Biroq uning rejissor Farah Xonning “Men borman-ku” filmidagi Bollivud yulduzi Shorux Xon bilan partnyor bo‘lgani va loyihadagi Lakshman roli hamon yodga olinadi. Shundan so‘ng aktyor ko‘plab filmlarda rol o‘ynadi, biroq mashhur bo‘la olmadi.
Zayed Abbos Xon — Bollivud aktyori Sanjay Xon va uning rafiqasi Zarina Xonning to‘rt farzandi ichida eng kenjasi hisoblanadi. Darhaqiqat, u tug‘ilgandanoq e’tibor markazida bo‘lgan, chunki onasi uni yuragi ostida ko‘tarib yurganida, otasi go‘zal aktrisa Zinat Aman bilan ishqiy munosabatlarni boshlagan.
Homilador Zarina turmush o‘rtog‘i bilan “Taj” mehmonxonasida Zinatni kaltaklab, ko‘ziga jarohat yetkazganini ko‘pchilik biladi. Bu Bollivudda katta shov-shuvga sabab bo‘lgan dahshatli voqea edi. Xonlar oilasining munosabatlari yaxshi emas edi.
Xonlarning oilasida Zayeddan tashqari uchta qiz — Syuzanna, Farah Ali va Simona ulg‘aydi. Shunga qaramay, Sanjay Xon boshqa hamkasblari bilan ishqiy munosabatda bo‘lishni davom ettirdi. Biroq to‘rtinchi farzand Zayedning dunyoga kelishi juftlikni yana birlashtirdi. Zarina Zayedni mo‘jizakor bola deb biladi va butun oilani aynan u birlashtirganini aytgan.
Zayed Xon 1980-yilning 5-iyul sanasida tug‘ilgan. Uning katta opasi Simona Xon Ajay Aroraga turmushga chiqqan, Syuzanna aktyor 2000-yilda Ritik Roshan bilan turmush qurgan va oradan 14 yil o‘tib ajrashgan. Farah Xon Ali DJ Axil bilan oila qurgan. Shuningdek, Zayed marhum aktyor Feroz Xon va rejissor Akbar Xonning jiyani.
Uning amakivachchasi — aktyor Fardin Xon. Shuning uchun u taniqli qarindoshlarining izidan borgani ajablanarli holat emas.
U 2003-yilda “Menga ishon” filmida aktyor sifatida debyut qilgan. Shundan keyin Zayed juda ko‘p tanqidlarga uchradi va uning aktyorlik mahoratiga shubha qildiruvchi yomon mulohazalar bilan “siylandi”. Aynan shu vaqt ichida yuragi ezilgan aktyorni maktabdagi do‘sti Malayka Parekh qo‘llab-quvvatladi.
Malayka badavlat oilada voyaga yetgan. Uning otasi olmos biznesi bilan shug‘ullangan va Zayed uning jozibasi, g‘amxo‘rligiga oshiq edi. Ular bir-birini yaxshi ko‘rardi, biroq Xon otasi vafotidan keyin biznesni o‘z qo‘liga olgan Malaykaga teng kela olmasligini tushunib yetdi. U sevgilisidan mashhur bo‘lgunga qadar to‘yni keyinroqqa qoldirishini so‘radi va yetarlicha pul topdi.
2004-yilda Zayed “Men borman-ku” filmida ikkinchi darajali rolni o‘ynadi, bu uning faoliyatidagi eng mashhur rollaridan biriga aylandi. Bu “Vir va Zara” filmidan keyin yilning eng yuqori daromad keltirgan ikkinchi loyihasi bo‘ldi va aktyorga Filmfare mukofotining “Ikkinchi plandagi eng yaxshi aktyor” nominatsiyasida g‘olib bo‘lish imkonini berdi.
2005-yilning 20-noyabr sanasida Malayka va Zayed turmush qurdi. 2008-yilda ularning birinchi o‘g‘li Zidan, 2011-yilda esa Ariz ismli yana bir o‘g‘li dunyoga keldi.
Kino olamida vaqti-vaqti bilan Zayedning hamkasblari Esha Deol va Diya Mirza bilan aloqasi borligi haqida mish-mishlar yurardi, biroq bu shunchaki oddiy mish-mish edi.
2000-yillarning o‘rtalarida Xon juda ko‘p loyihalarda ishtirok etdi. Oilasini boqish uchun hech qaysi taklifni rad etmadi. Uni psixologik trillerlardan tortib komediyalargacha — turli janrdagi filmlarda ko‘rish mumkin. Aktyor “Va’da”, “Chalkash tuyg‘ular”, “X soat”, “Birinchi raqamli to‘y”, “Jang klubi”, “Istanbul missiyasi”, “Vorislar”, “Moviy tubsizlik” va boshqa loyihalarda suratga tushdi.
Biroq tomoshabinlar mashhur aktyorning o‘g‘liga e’tibor berishmadi. Loyihalar kassada muvaffaqiyatsizlikka uchradi va “Muhabbat, ayriliq, hayot” romantik komediyasi chiqqandan keyin uning karyerasi barbod bo‘ldi.
2017-yilda u o‘zini televideniyeda sinab ko‘rdi va “Nishon” teleserialida bosh rolni o‘ynadi, biroq aktyorning bu loyihadagi roli ham muvaffaqiyatsiz chiqdi. Xon taslim bo‘lmaydi. 43 yoshli aktyor yaqinda yangi filmda suratga tushishini aytgan, biroq hozircha u loyihaning tafsilotlarni oshkor qilmayapti.
Izoh (0)