Зайед Хон Болливудда унчалик муваффақиятга эриша олмади ва актёр анчадан буён оммавий ахборот воситаларида тилга олинмаяпти. Бироқ унинг режиссёр Фараҳ Хоннинг “Мен борман-ку” фильмидаги Болливуд юлдузи Шорух Хон билан партнёр бўлгани ва лойиҳадаги Лакшман роли ҳамон ёдга олинади. Шундан сўнг актёр кўплаб фильмларда рол ўйнади, бироқ машҳур бўла олмади.
Зайед Аббос Хон — Болливуд актёри Санжай Хон ва унинг рафиқаси Зарина Хоннинг тўрт фарзанди ичида энг кенжаси ҳисобланади. Дарҳақиқат, у туғилганданоқ эътибор марказида бўлган, чунки онаси уни юраги остида кўтариб юрганида, отаси гўзал актриса Зинат Аман билан ишқий муносабатларни бошлаган.
Ҳомиладор Зарина турмуш ўртоғи билан “Таж” меҳмонхонасида Зинатни калтаклаб, кўзига жароҳат етказганини кўпчилик билади. Бу Болливудда катта шов-шувга сабаб бўлган даҳшатли воқеа эди. Хонлар оиласининг муносабатлари яхши эмас эди.
Хонларнинг оиласида Зайеддан ташқари учта қиз — Сюзанна, Фараҳ Али ва Симона улғайди. Шунга қарамай, Санжай Хон бошқа ҳамкасблари билан ишқий муносабатда бўлишни давом эттирди. Бироқ тўртинчи фарзанд Зайеднинг дунёга келиши жуфтликни яна бирлаштирди. Зарина Зайедни мўжизакор бола деб билади ва бутун оилани айнан у бирлаштирганини айтган.
Зайед Хон 1980 йилнинг 5 июль санасида туғилган. Унинг катта опаси Симона Хон Ажай Арорага турмушга чиққан, Сюзанна актёр 2000 йилда Ритик Рошан билан турмуш қурган ва орадан 14 йил ўтиб ажрашган. Фараҳ Хон Али ДЖ Ахил билан оила қурган. Шунингдек, Зайед марҳум актёр Фероз Хон ва режиссёр Акбар Хоннинг жияни.
Унинг амакиваччаси — актёр Фардин Хон. Шунинг учун у таниқли қариндошларининг изидан боргани ажабланарли ҳолат эмас.
У 2003 йилда “Менга ишон” фильмида актёр сифатида дебют қилган. Шундан кейин Зайед жуда кўп танқидларга учради ва унинг актёрлик маҳоратига шубҳа қилдирувчи ёмон мулоҳазалар билан “сийланди”. Айнан шу вақт ичида юраги эзилган актёрни мактабдаги дўсти Малайка Парекҳ қўллаб-қувватлади.
Малайка бадавлат оилада вояга етган. Унинг отаси олмос бизнеси билан шуғулланган ва Зайед унинг жозибаси, ғамхўрлигига ошиқ эди. Улар бир-бирини яхши кўрарди, бироқ Хон отаси вафотидан кейин бизнесни ўз қўлига олган Малайкага тенг кела олмаслигини тушуниб етди. У севгилисидан машҳур бўлгунга қадар тўйни кейинроққа қолдиришини сўради ва етарлича пул топди.
2004 йилда Зайед “Мен борман-ку” фильмида иккинчи даражали ролни ўйнади, бу унинг фаолиятидаги энг машҳур ролларидан бирига айланди. Бу “Вир ва Зара” фильмидан кейин йилнинг энг юқори даромад келтирган иккинчи лойиҳаси бўлди ва актёрга Filmfare мукофотининг “Иккинчи пландаги энг яхши актёр” номинациясида ғолиб бўлиш имконини берди.
2005 йилнинг 20 ноябрь санасида Малайка ва Зайед турмуш қурди. 2008 йилда уларнинг биринчи ўғли Зидан, 2011 йилда эса Ариз исмли яна бир ўғли дунёга келди.
Кино оламида вақти-вақти билан Зайеднинг ҳамкасблари Эша Деол ва Дия Мирза билан алоқаси борлиги ҳақида миш-мишлар юрарди, бироқ бу шунчаки оддий миш-миш эди.
2000 йилларнинг ўрталарида Хон жуда кўп лойиҳаларда иштирок этди. Оиласини боқиш учун ҳеч қайси таклифни рад этмади. Уни психологик триллерлардан тортиб комедияларгача — турли жанрдаги фильмларда кўриш мумкин. Актёр “Ваъда”, “Чалкаш туйғулар”, “Х соат”, “Биринчи рақамли тўй”, “Жанг клуби”, “Истанбул миссияси”, “Ворислар”, “Мовий тубсизлик” ва бошқа лойиҳаларда суратга тушди.
Бироқ томошабинлар машҳур актёрнинг ўғлига эътибор беришмади. Лойиҳалар кассада муваффақиятсизликка учради ва “Муҳаббат, айрилиқ, ҳаёт” романтик комедияси чиққандан кейин унинг карьераси барбод бўлди.
2017 йилда у ўзини телевидениеда синаб кўрди ва “Нишон” телесериалида бош ролни ўйнади, бироқ актёрнинг бу лойиҳадаги роли ҳам муваффақиятсиз чиқди. Хон таслим бўлмайди. 43 ёшли актёр яқинда янги фильмда суратга тушишини айтган, бироқ ҳозирча у лойиҳанинг тафсилотларни ошкор қилмаяпти.
Изоҳ (0)