Qirg‘izistonning Issiqko‘l viloyatida Markaziy Osiyoning turkiyzabon davlatlari futbol assotsiatlasiyalari mutaxassislari ishtirokida sammit bo‘lib o‘tdi.
Assotsiatsiyalar o‘rtasida hamkorlikni mustahkamlash va qo‘shma loyihalarni amalga oshirish masalalarini muhokama qilishga qaratilgan uchrashuvda O‘zbekiston futbol assotsiatsiyasi birinchi vitse-prezidenti Ravshan Ermatov ham ishtirok etgan.
Yig‘ilishda Qozog‘iston futbol federatsiyasi rahbari Adilet Barmenqulov O‘zbekiston bilan birgalikda 2034-yilgi kattalar o‘rtasidagi Jahon Chempionatiga mezbonlik qilish rejasini o‘rtaga tashlagan. Bu haqida “Championat Asia” sayti ma’lum qildi.
Shuningdek, Qozog‘iston terma jamoasi bosh murabbiyi Magomed Adiev ham ushbu xabarga o‘z munosabatini bildirdi: “Qozog‘iston va O‘zbekiston nomzod bo‘lishi mumkinligiga ijobiy munosabatdaman. Barcha muxlislar qatori men ham Jahon Chempionati shu yerda o‘tkazilishini istayman. Hamma Qozog‘iston terma jamoasini mundialda ishtirok etishini, agar u uyda o‘tkazilsa, albatta, mamlakat futboli uchun “bum” bo‘lishini orzu qiladi. Lekin buning uchun hali qilinadigan ishlar ko‘p, masalan, stadionlar. Federatsiya prezidenti infratuzilmalarda, tizim qurilishida faol ishtirok etadi”.
Biroq Qozog‘iston Sport vazirligi bu xabarlarni rad etdi.
“Albatta, muxlislar bundan xursand bo‘ldi. Lekin mamlakat madaniyat va sport ishlari vazirligi masalaga nuqta qo‘yishga qaror qildi. Ular mundialni Qozog‘istonda o‘tkazish masalasini ko‘rib chiqmayapti, shu sababli mamlakatimiz chempionat uchun ariza topshirishni rejalashtirmayapti”, — deyiladi bayonotda.
Izoh (0)