Ўзбекистон ва Қозоғистон ЖЧ—2034 га мезбонлик қилиш учун қўшма ариза топширмоқчилиги хабар қилинди

Қирғизистоннинг Иссиқкўл вилоятида Марказий Осиёнинг туркийзабон давлатлари футбол ассоциатласиялари мутахассислари иштирокида саммит бўлиб ўтди. 

Ассоциациялар ўртасида ҳамкорликни мустаҳкамлаш ва қўшма лойиҳаларни амалга ошириш масалаларини муҳокама қилишга қаратилган учрашувда Ўзбекистон футбол ассоциацияси биринчи вице-президенти Равшан Эрматов ҳам иштирок этган. 

Йиғилишда Қозоғистон футбол федерацияси раҳбари Адилет Барменқулов Ўзбекистон билан биргаликда 2034 йилги катталар ўртасидаги Жаҳон Чемпионатига мезбонлик қилиш режасини ўртага ташлаган. Бу ҳақида “Championat Asia” сайти маълум қилди. 

Шунингдек, Қозоғистон терма жамоаси бош мураббийи Магомед Адиэв ҳам ушбу хабарга ўз муносабатини билдирди: “Қозоғистон ва Ўзбекистон номзод бўлиши мумкинлигига ижобий муносабатдаман. Барча мухлислар қатори мен ҳам Жаҳон Чемпионати шу ерда ўтказилишини истайман. Ҳамма Қозоғистон терма жамоасини мундиалда иштирок этишини, агар у уйда ўтказилса, албатта, мамлакат футболи учун “бум” бўлишини орзу қилади. Лекин бунинг учун ҳали қилинадиган ишлар кўп, масалан, стадионлар. Федерация президенти инфратузилмаларда, тизим қурилишида фаол иштирок этади”.

Бироқ Қозоғистон Спорт вазирлиги бу хабарларни рад этди. 

“Албатта, мухлислар бундан хурсанд бўлди. Лекин мамлакат маданият ва спорт ишлари вазирлиги масалага нуқта қўйишга қарор қилди. Улар мундиални Қозоғистонда ўтказиш масаласини кўриб чиқмаяпти, шу сабабли мамлакатимиз чемпионат учун ариза топширишни режалаштирмаяпти”, — дейилади баёнотда.