McDonald’s va franshiza egasi issiq naggetsdan oyog‘i kuygan qizning oilasiga 800 ming dollar tovon to‘laydi. Bu haqda AQShning Florida shtati Braurard okrugidagi sudyalar hay’ati qaroriga tayanib, CBS News telekanali xabar bermoqda.
2019-yilda to‘rt yoshli qizchaning onasi Tamarac fastfud restoranida Happy Meal buyurtma qilib, mashinaning orqa o‘rindig‘ida o‘tirgan 4 yoshli qiziga bir quti naggetsni bergan. Bitta naggets qutidan tushib, avtomobil o‘rindig‘i bilan qizning oyog‘i o‘rtasida ikki daqiqacha qolib ketgan. Oqibatda qizaloq ikkinchi darajali kuyish jarohati olgan. Uning oyog‘ida chandiq qolgan.
“Hakamlar a’zolari qizning oilasiga og‘riq va iztiroblar, jarohatlar, ruhiy qiynalishlar, noqulayliklar va hayotdan zavqlanish qobiliyatini yo‘qotganliklari uchun jami 800 ming dollar berilishi kerakligi bo‘yicha qaror qabul qilishdi”, — deyiladi telekanal xabarida.
Bu summa oldingi jarohatlar uchun 400 000 dollar va kelajakda ko‘rishi mumkin bo‘lgan zarar uchun 400 000 dollar sifatida hisoblangan.
Qayd etilishicha, jarohatlangan qizning oilasi 15 million dollar tovon talab qilgan. Shu bilan birga, jabrlanuvchining onasi “adolatli qaror” qabul qilgan hakamlar hay’ati qaroridan mamnun ekanini aytdi, deb yozadi NBC.
Izoh (0)