Indoneziya hukumati 12 nafar gumonlanuvchini, jumladan, politsiya va immigratsiya xizmati xodimini 122 nafar insonning buyragini sotish maqsadida Kambodjaga olib borganlikda ayblab, hibsga oldi, deb xabar bermoqda The Star.
Gumonlanuvchilar Indoneziyaning odam savdosi bo‘yicha qonunini buzganlikda aybdor deb topilsa, 15 yilgacha qamoq jazosi va 600 million rupiygacha (taxminan 40 ming dollar) jarimaga tortilishi mumkin.
“Qo‘lga olinganlar butun Indoneziyadan odamlarni ijtimoiy tarmoqlar orqali yollab, Kambodjaga buyrak ko‘chirib o‘tkazish uchun jo‘natganlikda ayblangan”, — dedi Jakarta politsiyasining jinoiy qidiruv bo‘limi direktori Xenki Xaryadi.
Jinoiy sxema qurbonlarining har biriga 135 million rupiy (9000 dollar) va’da qilingan.
"Jabrlanuvchilar pulga muhtoj bo‘lgani uchun buyraklarini sotishga rozi bo‘lishgan. Ularning ko‘pchiligi pandemiya paytida ishidan ayrilgan odamlar", dedi Xaryadi.
2019-yilda Indoneziya hukumati mamlakatdagi eng yirik odam savdosi ishi bo‘yicha sakkiz kishini hibsga olgandi. O‘shanda 1200 ga yaqin inson ichki tana a’zolarini sotish uchun xorijga olib ketilgan.
Izoh (0)