Nyu-York meri Erik Adams 19-iyul kuni shahardagi migrantlar sonini kamaytirishga qaratilgan chora-tadbirlar amalga oshirilishini ma’lum qildi.
Xususan, yaqin kunlarda Nyu-Yorkdagi boshpanalarda bo‘lgan katta yoshli migrantlarga o‘zlariga boshqa uy-joy topish uchun 60 kun vaqtlari borligi to‘g‘risida bildirishnomalar beriladi.
Shu bilan birga, rasmiylar migrantlarga yangi boshpana topishda har tomonlama yordam berishga tayyor. Agar ular belgilangan muddat oxirigacha yangi uy topa olmasalar, shunchaki boshpana so‘rab qayta murojaat qilishlari kerak bo‘ladi.
Bundan tashqari, rasmiylar AQSH-Meksika chegarasida Nyu-York endi Meksikadan kelgan migrantlarni qabul qila olmasligi va shu bilan birga ular uchun avvalgidek ijtimoiy ta’minot darajasini saqlab qola olmasligi haqida varaqalar tarqatishni boshlaydi.
O‘tgan bahordan beri Nyu-York 90 mingga yaqin migrantni qabul qilgan, ulardan 55 ming nafari hamon shahar qaramog‘ida, deydi Adams.
"Nyu-Yorkka har kuni 300-500 boshpana izlovchi keladi. Bir yildan ortiq vaqtdan beri Nyu-York bu inqirozni yolg‘iz o‘zi hal qilmoqda — bizga shtat rahbariyati va federal hukumat ham yordamlashishi kerak", dedi Adams.
Nyu-York 1981-yilgi sud qarori tufayli uysiz qolgan har bir kishiga boshpana berishga majbur. May oyida Nyu-York meri suddan agar hukumat migrantlarga g‘amxo‘rlik qilish uchun yetarli mablag‘ga ega bo‘lmasa, bolalari bo‘lmagan katta yoshdagi migrantlarga boshpana berishni rad etish imkoniyatini qonuniylashtirishni so‘rab murojaat qilgan edi.
Izoh (0)