Tesla ikkinchi chorak natijalarini e’lon qildi, bu bir qator ko‘rsatkichlar bo‘yicha rekord darajadagi va tahlilchilar kutganidan yuqori bo‘ldi.
Hisobot davridagi daromad o‘tgan yilning ikkinchi choragiga nisbatan 45 foizga o‘sdi va rekord darajadagi 24,9 milliard dollarni tashkil etdi. Tahlilchilar esa 24,47 milliard dollarni prognoz qilgan edilar.
Har bir aksiya uchun daromad 0,91 dollarni tashkil qildi (kutilgani 0,82 dollar edi). Sof foyda 2022-yilning shu davriga nisbatan 20 foizga o‘sdi va 2,7 milliard dollarga yetdi.
Tesla o‘z modellari narxlarini pasaytirishi va mijozlar uchun foydali bo‘lgan boshqa bitimlarni amalga oshirishi sababli daromadlar ko‘tarildi. Biroq, xuddi shu sababga ko‘ra, yalpi marja kutilgan 18,8% nisbatan 18,2% ni tashkil etdi. Bu ko‘rsatkich joriy yilning birinchi choragiga (19,3%), shiningdek, 2022-yilning to‘rtinchi choragiga (24%) nisbatan pastroq bo‘ldi.
Operasion rentabellik ham kamayib, 5 foizni tashkil qildi (2022-yilda 9,6 foiz bo‘lgan). Ammo narxlarni pasaytirish tufayli Tesla butun dunyo bo‘ylab rekord darajada — 466 140 ta elektromobil sota oldi, bu o‘tgan yilning shu davriga nisbatan deyarli ikki baravar ko‘p.
Kompaniya, shuningdek, Tesla modellarida avtopilot tizimini takomillashtirish uchun zarur bo‘lgan Dojo superkompyuterini yaratish uchun 2024-yil oxirigacha 1 milliard dollardan ortiq sarmoya kiritishini ma’lum qildi. Dojo katta hajmdagi ma’lumotlarni, jumladan Tesla elektromobillari videolarini qayta ishlashga qodir hisoblanadi.
Izoh (0)