Surxondaryo viloyati hokimi Ulug‘bek Qosimov uch nafar amaldorni lavozimidan oldi. Bu haqda “Daryo”ga viloyat hokimligi axborot xizmati xabar berdi.
Taʼkidlanishicha, viloyat rahbari qurilish sohasidagi ishlarni muhokama qilgan.
“Viloyat hokimi Ulug‘bek Qosimov rahbarligida videoselektor yig‘ilishi o‘tkazildi. Yig‘ilishda ijro intizomi, qurilish sohasida yo‘l qo‘yilgan kamchiliklar, maktablarni yangi o‘quv yiliga tayyorlash va boshqa muhim masalalar muhokama qilindi. Prezident Farmon va qarorlari, topshiriqlari, Vazirlar Mahkamasi qarorlari, yig‘ilish bayonlari hamda hududlarda o‘tkazilgan o‘rganishlar davomida berilgan topshiriqlar ijrosi tahlil qilinib, ijro intizomiga qatʼiy rioya qilmaganligi, topshiriqlar ijrosini to‘liq taʼminlamaganligi uchun viloyat hokimining tarmoqlar bo‘yicha o‘rinbosarlari ogohlantirildi”, — deyiladi hokimlik maʼlumotida.
Yig‘ilishda qurilish sohasida yo‘l qo‘yilgan kamchiliklar keskin tanqid qilingan.
“Aniqlangan kamchiliklarni bartaraf etmagan, o‘z vazifasini lozim darajada bajarmaganligi uchun ‘Yagona buyurtmachi xizmati’ DUK direktori, Qurilish va uy-joy kommunal xo‘jaligi boshqarmasi boshlig‘i, Mintaqaviy yo‘llarni qurish buyurtmachi xizmati DUK Surxondaryo filial direktori ishdan olindi, shuningdek ishidagi kamchiliklari sabab ‘Surxondaryosuvqurilishinvest’ davlat unitar korxonasi direktori Salim Avazovni ham lavozimidan olish bo‘yicha yuqori turuvchi tashkilotga taklif berildi”, — deydi hokimlik axborot xizmati rahbari Murodbek Davlatov.
Qo‘shimcha qilinishicha, yig‘ilishda kun tartibidagi barcha masalalar tanqidiy tahlil qilinib, masʼullarning axborotlari tinglangan. Yo‘l qo‘yilgan kamchiliklar ko‘rsatib o‘tilib, ularni bartaraf etish bo‘yicha muddat va vazifalar belgilab berilgan.
Ulug‘bek Qosimov 2023-yilning may oyida hududlarga tashrifi davomida belgilab berilgan topshiriqlari bajarilmagani, “Ijro.gov.uz” tizimi orqali ijro uchun yuborilgan topshiriqlarning bajarilishi nazoratdan chiqqani uchun barcha o‘rinbosarlariga ogohlantirish bergandi. Bir nechta mansabdorlarga nisbatan intizomiy jazo chorasini qo‘llagandi.
Izoh (0)