Samarqand viloyatining Samarqand shahrida MCHJga qarashli 3 gektar yer-maydonini 150 ming dollarga sotishga urinib, oldindan 40 ming dollar olganlar qo‘lga olindi. Bu haqda “Daryo”ga viloyat IIB axborot xizmati xabar berdi.
Taʼkidlanishicha, holat 2023-yilning 14-iyul kuni DXXning viloyat boshqarmasi, viloyat IIB va viloyat prokuraturasi hamkorligidagi tezkor tadbirda fosh etilgan.
Videoda aytilishicha, tadbirkorlik bilan shug‘ullanish umidida yurgan fuqaro bo‘sh yer maydoni izlab yurgan paytda viloyatning Oqdaryo tumanida yashovchi ikki nafar fuqaro unga 3 gektar yeri borligini aytgan.
“Oqdaryo tumanida yashovchi ikki nafar fuqaro bo‘sh yer maydoni izlab yurgan fuqaro ishonchiga kirib, ‘Dahbet’ massivi hududida joylashgan MCHJga tegishli 3 gektar yer-maydonini 150 ming dollarga sotmoqchiligini aytadi. Shuningdek, 10 ming dollar evaziga tuman hokimligidagi tanishlari orqali shu yer maydonini issiqxona uchun rasmiylashtirib berishini bildirib, oldindan 40 ming dollar so‘raydi”, — deyiladi viloyat IIB axborotida.
Qayd etilishicha, ikki nafar fuqaro tadbirkorlik qilish ilinjida yurgan fuqarodan 40 ming AQSH dollari olayotgan paytda qo‘lga tushgan.
“Mazkur holat yuzasidan tergovga qadar tekshiruv harakatlari olib borilmoqda”, — deydi viloyat IIB axborot xizmati rahbari Jahongir Sagdullayev.
Izoh (0)