UzAuto Motors Qozog‘istonning Kostanay viloyatidagi “SariarkaAvtoProm” zavodida Chevrolet Onix avtomobillarini kichik uzelli yig‘ishni yo‘lga qo‘yishni rejalashtirmoqda. Bu haqda hukumat rahbarlari o‘rinbosarlari darajasidagi mamlakatlar ishchi guruhi yig‘ilishida maʼlum qilindi.
Ikki tomonlama hujjatlarda iqtisodiyotning turli tarmoqlarida yirik loyihalar rejalashtirilgan. Xususan, Qarag‘anda viloyatida Artel maishiy texnika ishlab chiqarishni yo‘lga qo‘yish loyihasi o‘z vaqtida amalga oshirilmoqda.
Shu bilan birga, 2024-yilning birinchi choragidan Kostanay viloyatida Chevrolet Onix avtomobillarini yig‘ishni yo‘lga qo‘yish loyihasi ishlab chiqilgan. Bu bo‘yicha shartnomalar tuzilib, payvandlash, bo‘yash, yig‘ish sexlari uchun uskunalarni tayyorlash ishlari olib borilmoqda.
Kostanayda Onix avtomobilini yirik uzelli yig‘ish ishlari 2023-yil may oyida boshlangan edi.
Kichik uzelli yig‘ish — bu avtomobilning asosiy turdagi butlovchi qismlari ishlab chiqaruvchi tomonidan yetkazib berilishi va mahalliy zavodda qator texnologik operatsiyalar (payvandlash, bo‘yash, ichini jihozlash) yordamida yig‘ilishidir.
UzAuto Motors may oyi boshida Chevrolet Onix va Tracker avtomobillari sotuvini to‘xtatgandi. Kompaniya 2022-yilda hamyonbop modellardan Spark, Nexia, Cobalt va Lacetti avtomobillari sotuvini to‘xtatib, Onix va Tracker uchun shartnomalar tuzishni boshlagan. Biroq 2023-yil may oyi boshidan narxi 207 million so‘mlik Onix va 211 million so‘mlik Tracker sotuvi to‘xtab qolgan.
UzAutoMotors iyul oyi boshida Asakadagi zavodda modernizatsiya ishlari olib borilishi sabab avtomobil ishlab chiqarish vaqtincha to‘xtatilishini eʼlon qilgandi. Kompaniya vakilining “Daryo”ga maʼlum qilishicha, zavodda avtomobil ishlab chiqarish 17-iyul (dushanba) kunidan boshlangan.
Izoh (0)