Самарқанд вилоятининг Самарқанд шаҳрида МЧЖга қарашли 3 гектар ер майдонини 150 минг долларга сотишга уриниб, олдиндан 40 минг доллар олганлар қўлга олинди. Бу ҳақда “Дарё”га вилоят ИИБ ахборот хизмати хабар берди.
Таъкидланишича, ҳолат 2023 йилнинг 14 июль куни ДХХнинг вилоят бошқармаси, вилоят ИИБ ва вилоят прокуратураси ҳамкорлигидаги тезкор тадбирда фош этилган.
Видеода айтилишича, тадбиркорлик билан шуғулланиш умидида юрган фуқаро бўш ер майдони излаб юрган пайтда вилоятнинг Оқдарё туманида яшовчи икки нафар фуқаро унга 3 гектар ери борлигини айтган.
“Оқдарё туманида яшовчи икки нафар фуқаро бўш ер майдони излаб юрган фуқаро ишончига кириб, ‘Даҳбет’ массиви ҳудудида жойлашган МЧЖга тегишли 3 гектар ер майдонини 150 минг долларга сотмоқчилигини айтади. Шунингдек, 10 минг доллар эвазига туман ҳокимлигидаги танишлари орқали шу ер майдонини иссиқхона учун расмийлаштириб беришини билдириб, олдиндан 40 минг доллар сўрайди”, — дейилади вилоят ИИБ ахборотида.
Қайд этилишича, икки нафар фуқаро тадбиркорлик қилиш илинжида юрган фуқародан 40 минг АҚШ доллари олаётган пайтда қўлга тушган.
“Мазкур ҳолат юзасидан терговга қадар текширув ҳаракатлари олиб борилмоқда”, — дейди вилоят ИИБ ахборот хизмати раҳбари Жаҳонгир Сагдуллаев.
Изоҳ (0)