Fransiya politsiyasi 14-iyul — Milliy bayram kunida 96 kishi hibsga olinganini va 15-iyulga o‘tar kechasi 255 ta mashinaga o‘t qo‘yilganini ma’lum qildi.
Qayd etilishicha, yetti nafar politsiyachi tan jarohati olgan, shuningdek, huquq-tartibot idoralari xodimlariga nisbatan 51 ta mushak otish holatlari aniqlangan.
Shu bilan birga, Milliy bayram doirasidagi tadbirlar 2022-yilga nisbatan ancha tinch o‘tgani ta’kidlanadi. O‘tgan yili bayram vaqtida 423 ta avtomobil yondirilib, 21 nafar politsiya xodimi tan jarohati olgan, huquqni muhofaza qiluvchi organlar xodimlariga nisbatan 333 ta pirotexnika vositalaridan foydalanish holatlari qayd etilgan.
Voqealarning mo‘tadil ekanligini Fransiya ichki ishlar vaziri Jerald Darmanin tasdiqladi.
“Fransiya bo‘ylab xalq sayillari, konsertlar va mushakbozliklar bo‘lib o‘tdi va 2022-yilga nisbatan zarar sezilarli darajada kamaydi. Bunga birinchi navbatda huquq-tartibot kuchlarimizning hushyorligi, sergakligi hamda ko‘plab profilaktik tekshiruvlar sababli erishildi. Ularga katta rahmat”, — deb yozadi u Twitter’dagi o‘z sahifasida.
Fransiyada bu yil 14-iyul Milliy bayram munosabati bilan tantanalar misli ko‘rilmagan xavfsizlik choralari ostida o‘tkazildi. Tartibni saqlashga jami 130 ming nafar politsiyachi va jandarmlar jalb qilingan. Bundan tashqari, yuzaga kelishi mumkin bo‘lgan tartibsizliklarni bostirish uchun maxsus kuchlar bo‘linmalari, milliy jandarmeriyaning zirhli guruhi, shuningdek, vertolyotlar va dronlar safarbar etilgan.
Izoh (0)