Миллий байрам куни 255 та автомобиль ёқиб юборилгани қайд этилди — Франция ИИВ

Франция полицияси 14 июль — Миллий байрам кунида 96 киши ҳибсга олинганини ва 15 июлга ўтар кечаси 255 та машинага ўт қўйилганини маълум қилди. 

Қайд этилишича, етти нафар полициячи тан жароҳати олган, шунингдек, ҳуқуқ-тартибот идоралари ходимларига нисбатан 51 та мушак отиш ҳолатлари аниқланган. 

Шу билан бирга, Миллий байрам доирасидаги тадбирлар 2022 йилга нисбатан анча тинч ўтгани таъкидланади. Ўтган йили байрам вақтида 423 та автомобиль ёндирилиб, 21 нафар полиция ходими тан жароҳати олган, ҳуқуқни муҳофаза қилувчи органлар ходимларига нисбатан 333 та пиротехника воситаларидан фойдаланиш ҳолатлари қайд этилган.

Воқеаларнинг мўтадил эканлигини Франция ички ишлар вазири Жералд Дарманин тасдиқлади.

“Франция бўйлаб халқ сайиллари, концертлар ва мушакбозликлар бўлиб ўтди ва 2022 йилга нисбатан зарар сезиларли даражада камайди. Бунга биринчи навбатда ҳуқуқ-тартибот кучларимизнинг ҳушёрлиги, сергаклиги ҳамда кўплаб профилактик текширувлар сабабли эришилди. Уларга катта раҳмат”, — деб ёзади у Twitter’даги ўз саҳифасида.  

Францияда бу йил 14 июль Миллий байрам муносабати билан тантаналар мисли кўрилмаган хавфсизлик чоралари остида ўтказилди. Тартибни сақлашга жами 130 минг нафар полициячи ва жандармлар жалб қилинган. Бундан ташқари, юзага келиши мумкин бўлган тартибсизликларни бостириш учун махсус кучлар бўлинмалари, миллий жандармериянинг зирҳли гуруҳи, шунингдек, вертолётлар ва дронлар сафарбар этилган.