Britaniya Mudofaa vazirligi 3000 nafar harbiy bo‘lmaganlar ish o‘rnini qisqartirib, yangi amaldorlarni ishga olishni vaqtincha to‘xtatadi. Vazirlik shu yo‘l bilan armiya maoshini oshirishni rejalashtirgan. Bu haqda Sky News telekanali manbalarga tayanib xabar berdi.
Avvalroq Qurolli kuchlar vaziri Jeyms Xippi harbiy bo‘lmagan yangi xodimlarni yollash to‘xtatilgani haqida ma’lum qilgandi. Sky News manbasiga ko‘ra, yangi xodimlarni ishga olish bir necha haftaga to‘xtatiladi, shundan so‘ng “nazorat ostida ishga qabul qilish uchun” qayta tiklanadi.
Sky News manbalari, shuningdek, telekanalga vazirlik kadrlar budjetini 5 foizga qisqartirishni rejalashtirayotganini aytdi. Ularning so‘zlariga ko‘ra, qisqartirish tabiiy usulda amalga oshiriladi – Mudofaa vazirligi ishlab turgan xodimlarni bo‘shatmasdan, shunchaki bo‘sh lavozimlarga yangi xodimlarni qabul qilmaslikni rejalashtirmoqda.
Rasmiy statistik ma’lumotlarga ko‘ra, Buyuk Britaniya Mudofaa vazirligida 60 mingga yaqin harbiy bo‘lmagan xodim bor, deya qayd etdi Sky News.
Shu hafta Buyuk Britaniya hukumati harbiylarning maoshlari 5 foizga oshirilishini, ularga qo‘shimcha 1000 funt sterling ham to‘lanishini e’lon qildi. Buyuk Britaniya bosh vaziri Rishi Sunak, shuningdek, ayrim idoralar harbiylarning maoshlarini oshirishni moliyalashtirish uchun o‘z budjetlaridan pul topishlari kerakligini aytdi.
Izoh (0)