AQSH Mudofaa vazirligi Ukraina allaqachon Vashingtondan kassetali o‘q-dorilar olganini tasdiqladi. Bu haqda Qo‘shma shtabning operatsiyalar bo‘yicha direktori, general-leytenant Duglas Sims ma’lum qildi, deb yozmoqda CNN.
Ukraina Qurolli kuchlarining “Tavriya” guruhi qo‘mondoni Oleksandr Tarnavskiy 13-iyul kuni CNN telekanaliga bergan intervyusida Ukraina kuchlari AQSHdan kassetali o‘q-dorilar olgani, ammo ulardan hali foydalanmaganini aytgandi.
“Biz ularni faqat oldik, hali foydalanmadik, lekin ular jang maydonidagi vaziyatni tubdan o‘zgartirishi mumkin. Dushman ham bu o‘q-dorilarni olish bizga ustunlik berishini tushunadi. Dushman mazkur o‘q-dorilarni ishlatishimiz ehtimoli bo‘lgan pozitsiyalardan chekinadi”, — dedi u.
AQSH iyul oyi boshida Ukrainaga yangi harbiy yordam paketini, jumladan kassetali o‘q-dorilar berilishini e’lon qildi. Ukraina prezidenti Vladimir Zelenskiy NATOning Vilnyusdagi sammitida bu snaryadlar faqat Ukrainaning bosib olingan hududlaridagi harbiy nishonlarga qarshi qo‘llanilishini aytdi. Shuningdek, u Rossiya qo‘shinlari Ukraina hududida kassetali o‘q-dorilardan doimiy ravishda foydalanayotganini ta’kidladi.
Rossiya mudofaa vaziri Sergey Shoyguning aytishicha, Rossiya Ukrainadagi urush paytida kassetali o‘q-dorilarni qo‘llashdan “tiyilgan”, biroq bunday snaryadlar Ukrainaga yetkazilsa, rus qo‘shinlari ularni Ukraina Qurolli kuchlariga qarshi qo‘llaydi.
Izoh (0)