Rossiya prezidenti Vladimir Putin 29-iyun kuni “Vagner” bilan uchrashuvda kompaniya komandirlariga “ish bilan taʼminlashning bir qancha variantlarini” taklif qilganini aytdi. Bu haqda u “Kommersant” muxbiri Andrey Kolesnikovga bergan intervyusida ma’lum qildi.
“Ular bilan uchrashuvda bir tomondan jang maydonida qilgan ishlariga baho berdim, ikkinchi tomondan, 24-iyun voqealari chog‘idagi qilmishlariga. Uchinchidan, buyog‘iga xizmat ko‘rsatishi mumkin bo‘lgan variantlarini ko‘rsatdim, shu jumladan, jangovar harakatlarda. Hammasi shu”, — dedi Rossiya prezidenti.
Uning tushuntirishicha, “Vagner” komandirlariga “barchasi bir joyda to‘planib, xizmatni davom ettirish” taklif qilingan va “ular uchun hech narsa o‘zgarmasligi” aytilgan.
“Bularni aytganimda ko‘pchilik bosh irg‘adi. Old qatorda o‘tirgan va buni ko‘rmagan Prigojin esa ‘Yo‘q, yigitlar bunday qarorga rozi emas’ deb aytdi”, — dedi Rossiya prezidenti.
Kolesnikov Putindan “Vagner” jangovar bo‘linma sifatida saqlanib qoladimi, deb so‘radi. Bunga javoban Rossiya prezidenti “Vagner” mavjud emasligi, chunki Rossiyada xususiy harbiy tashkilotlar to‘g‘risida qonun yo‘qligini aytdi.
“Bizda xususiy harbiy tashkilotlar to‘g‘risida qonun yo‘q! Shunchaki mavjud emas! Guruh bor, lekin yuridik jihatdan u mavjud emas! Bu haqiqiy qonuniylashtirish bilan bog‘liq alohida masala. Ammo bu oddiy emas, Davlat Dumasida, hukumatda muhokama qilinishi kerak bo‘lgan masala”, — deb qo‘shimcha qildi Putin.
Isyondan keyin Yevgeniy Prigojin va “Vagner” komandirlari Putin bilan uchrashgani haqida Fransiyaning Liberation gazetasi xabar bergandi. Keyinchalik bu ma’lumotni prezident matbuot kotibi Dmitriy Peskov tasdiqladi. Fransuz nashrining yozishicha, uchrashuvda Rossiya gvardiyasi rahbari Viktor Zolotov va Tashqi razvedka xizmati rahbari Sergey Narishkin ham ishtirok etgan.
Putinning Prigojin va “Vagner” bilan uchrashuvi kuni — 29 iyunda Peskov jurnalistlarga “Vagner” asoschisi qayerdaligini bilmasligini aytgandi.
Izoh (0)