Ukraina allaqachon AQSHdan kassetali o‘q-dorilarni olgan, biroq ulardan hali jang maydonida foydalanmagan. Bu haqda “Tavriya” operativ-strategik guruhi qo‘mondoni, brigada generali Aleksandr Tarnavskiy CNN’ga ma’lum qildi.
U bu turdagi o‘q-dorilar urush jarayoniga katta ta’sir ko‘rsatishiga ishonch bildirdi. Avvalroq Ukraina mudofaa vaziri Aleksey Reznikov ham kassetali bombalar urush qoidasini o‘zgartirishi, ular bosib olingan hududlarda qo‘llanishini ta’kidlagandi.
“Biz hozirgina kassetali o‘q-dorilarni oldik, ulardan hali foydalanmadik, biroq ular jang maydonidagi vaziyatni tubdan o‘zgartirishi mumkin”, — dedi Tarnavskiy.
Rasman Ukraina kassetali bombalar kelganini tasdiqlamagan, biroq ular aholi zich joylashgan hududlarda ishlatilmasligi haqida Amerikaga allaqachon kafolat bergan.
Ukrainaga kassetali o‘q-dorilar berilishi
AQSH Ukrainaga kassetali o‘q-dorilar (yoki kassetali bombalar) beradi. U o‘nlab-yuzlab kichikroq bombalarni o‘z ichiga olgan konteynerlardir. Ularni samolyotdan, artilleriyadan, raketa otish moslamalaridan, dengiz qurollaridan otish mumkin.
Kassetali o‘q-dorilar oldindan belgilangan balandlikda ochiladi, bu mo‘ljallangan nishonning maydoniga bog‘liq bo‘lib, ichidagi o‘q-dorilar belgilangan hududga taqsimlanadi. O‘q-dorilar bir-biriga taymer bilan bog‘langan va yerga yaqinroq portlaydi.
Rossiyaning Ukrainaga kassetali bombalar berilayotganiga munosabati qanday?
Rossiya mudofaa vaziriga ko‘ra, Ukrainaga kassetali o‘q-dorilar yetkazib berilsa, Rossiya qo‘shinlari Ukraina armiyasiga qarshi xuddi shunday vositalarni qo‘llashga majbur bo‘ladi. U Amerika rahbariyatining bu qarori konfliktning cho‘zilishiga ta’sir qilishini ta’kidladi.
Rossiya mudofaa vaziri mamlakat “har ehtimolga qarshi” kassetali bombalarga egaligini aytdi.
Nima uchun kassetali o‘q-dorilar bahsga sabab bo‘lmoqda?
Bombalar katta maydonga tushgani sababli ular jangovar bo‘lmagan hududlarga ham tahdid solishi mumkin. Bundan tashqari, Xalqaro Qizil Xoch qo‘mitasi ma’lumotlariga ko‘ra, o‘q-dorilarning 10 foizdan 40 foizgacha bo‘lgan qismi nobud bo‘ladi va portlamagan o‘q-dorilar tinch aholi uchun yillar va hatto o‘nlab yillar davomida xavf tug‘diradi.
Potensial halokatli kassetali o‘q-dorilar Laos va Vyetnamda ishlatilganidan 50 yil o‘tib hamon portlamay qolmoqda, bu esa mazkur qurollarni keng miqyosda taqiqlashni talab qilishga undadi.
Kassetali o‘qlar to‘g‘risidagi konvensiya tufayli dunyoning aksariyat mamlakatlari ushbu qurollardan foydalanishni allaqachon taqiqlab qo‘ygan, bu esa ularni zaxiralash, ishlab chiqarish va uzatishni ham taqiqlaydi. Ushbu konvensiyaga 123 davlat qo‘shilgan, ammo yana 71 davlat (xususan, AQSH, Ukraina, Rossiya) qo‘shilmagan.
Izoh (0)