АҚШ Мудофаа вазирлиги Украина аллақачон Вашингтондан кассетали ўқ-дорилар олганини тасдиқлади. Бу ҳақда Қўшма штабнинг операциялар бўйича директори, генерал-лейтенант Дуглас Симс маълум қилди, деб ёзмоқда CNN.
Украина Қуролли кучларининг “Таврия” гуруҳи қўмондони Олександр Тарнавский 13 июль куни CNN телеканалига берган интервьюсида Украина кучлари АҚШдан кассетали ўқ-дорилар олгани, аммо улардан ҳали фойдаланмаганини айтганди.
“Биз уларни фақат олдик, ҳали фойдаланмадик, лекин улар жанг майдонидаги вазиятни тубдан ўзгартириши мумкин. Душман ҳам бу ўқ-дориларни олиш бизга устунлик беришини тушунади. Душман мазкур ўқ-дориларни ишлатишимиз эҳтимоли бўлган позициялардан чекинади”, — деди у.
АҚШ июль ойи бошида Украинага янги ҳарбий ёрдам пакетини, жумладан кассетали ўқ-дорилар берилишини эълон қилди. Украина президенти Владимир Зеленский НАТОнинг Вильнюсдаги саммитида бу снарядлар фақат Украинанинг босиб олинган ҳудудларидаги ҳарбий нишонларга қарши қўлланилишини айтди. Шунингдек, у Россия қўшинлари Украина ҳудудида кассетали ўқ-дорилардан доимий равишда фойдаланаётганини таъкидлади.
Россия мудофаа вазири Сергей Шойгунинг айтишича, Россия Украинадаги уруш пайтида кассетали ўқ-дориларни қўллашдан “тийилган”, бироқ бундай снарядлар Украинага етказилса, рус қўшинлари уларни Украина Қуролли кучларига қарши қўллайди.
Изоҳ (0)