Дунёдаги энг катта круиз кемаси Icon of the Seas келаси йилнинг январида сафарга отланади, деб хабар берди Forbes.
Йўловчи лайнери Royal Caribbean International компаниясига тегишли. Унинг узунлиги 365 метрга етади, оғирлиги 250 минг тоннадан ошади ва бортда 5 610 йўловчи ҳамда 2 350 нафар хизматчини сиғдира олади. Улкан лайнернинг диққатга сазовор хусусияти шундаки, у афсонавий “Титаник”дан 5 баравар оғирроқ.
Icon of the Seas қурилишидан олдин худди шу Royal Caribbean компаниясининг Wonder of the Seas кемаси денгиздаги энг катта круиз ҳисобланган. Хусусиятларни солиштирсак, Icon аввалгисидан деярли 15 тонна оғирроқ ва 3 метр узунроқ эканини фарқлаш мумкин. Қайд этилишича, янги кема экологик тоза суюлтирилган табиий газда ҳаракатланади. Кема қурилиши 2021 йилда бошланган бўлиб, уни 26-октябрда сувга тушириш режалаштирилган.
Рекордни янгилаган лайнер йўловчилари, шубҳасиз, бортда зерикмайди: уларга 40 дан ортиқ кўнгилочар машғулотлар таклиф этилади. Гигант кеманинг асосий “хусусияти” шундаки, унда бассейнлар ва жакузилардан иборат улкан денгиз аквапарки бор. Бундан ташқари, кемада очиқ осмон остидаги жонли ўсимликлар деворлари, 16 метрли шаршара, “совуқ орол” ва “ҳиссиётлар ороли”ни ўз ичига олган беш қаватли “Марказий боғ” қурилган. Йўловчиларга қулайлик яратиш мақсадида 22 та лифт, кинотеатр, савдо ва кўнгилочар маркази, казино, фитнес маркази, мини-голф майдончалари, тепаликка тирмашиб чиқиш деворлари қурилган.
Кемага чиқиш учун энг арзон чипта нархи 1,5 минг доллар бўлиб, улар дастлабки кунларданоқ тугаган, ҳозирда кемада нархи 10 800 доллар бўлган бир нечта премиум жойлар мавжуд.
Лайнерда Майамидан Кариб денгизининг шарқий ва ғарбий қисмларига сузиб бориш мумкин бўлади. 7 кунлик маршрут шахсий оролга ташрифни ҳам ўз ичига олади.
Изоҳ (0)