Tesla bosh direktori va Twitter egasi Ilon Mask sun’iy intellekt bo‘yicha o‘zining xAI startapini ishga tushirganini ma’lum qildi, deb xabar bermoqda Reuters.
“Reallikni tushunish uchun xAI yaratilganini e’lon qilaman”, — deb yozdi Mask Twitter’da.
Shundan so‘ng, xAI loyihasining Twitter sahifasida shunday xabar qoldirdi:
“Eng asosiy savollardan qaysilar javobsiz qolgan?”
Reuters ma’lumotlariga ko‘ra, xAI jamoasi tarkibida sobiq DeepMind muhandisi Igor Babushkin, Google’ning sobiq xodimlari Toni Vu va Kristian Szegedi hamda avval Microsoft’da ishlagan Greg Yang bor.
Aprel oyida Ilon Mask sun’iy intellekt TruthGPT’ni ishga tushirishi haqida e’lon qilgandi, u Google va Microsoft chiqargan sun’iy intellekt bilan raqobat qilishi kutilmoqda.
Mart oyida Ilon Mask Nevada shtatida X.AI Corp. kompaniyasini ro‘yxatdan o‘tkazdi.
Eslatib o‘tamiz, mart oyida Ilon Mask, Apple asoschilaridan biri Stiv Voznyak va mingdan ortiq ekspertlar umumiy xavfsizlik protokollari joriy etilgunga qadar ilg‘or sun’iy intellektni rivojlantirishni kamida olti oyga to‘xtatib turishga chaqiruvchi ochiq xatni imzolagan edi. Maktub mualliflariga ko‘ra, bu texnologiya insoniyatga xavf tug‘diradi, chunki “kuchli raqamli intellekt”ni hatto yaratuvchilari ham boshqara olmaydi va zamonaviy sun’iy intellekt tizimlari odamlar bilan raqobatlasha boshlaydi.
Maktub chop etilishidan biroz oldin Microsoft tomonidan moliyalashtirilgan Amerika IT-kompaniyasi OpenAI ChatGPT asosini tashkil etuvchi generativ sun’iy intellekt tili modelining yangi versiyasi bo‘lgan GPT-4 ni taqdim etgan.
Izoh (0)