Germaniyaning Rheinmetall konserni yaqin 12 hafta ichida Ukrainada zirhli texnikalar (bronotexnika) ishlab chiqaruvchi zavod ochadi, dedi kompaniya bosh direktori Armin Papperger CNN telekanaliga bergan intervyusida.
Qayd etilishicha, korxona mamlakat g‘arbida joylashadi. Rheinmetall zavodni Ukraina davlat mudofaa konserni “Ukroboronprom” bilan birgalikda boshqarishni rejalashtirmoqda. Korxona, shuningdek, ukrainalik mutaxassislarni tanklar va boshqa bronotexnikalarga texnik xizmat ko‘rsatish bo‘yicha o‘qitadi.
Pappergerning ta’kidlashicha, zavod Rossiyaning ehtimoliy zarbalaridan himoya qilinadi.
“Hozir Ukrainada harbiy mahsulotlar ishlab chiqaradigan ko‘plab zavodlar mavjud. Bu shulardan biri bo‘ladi. Biz uni himoya qila olamiz”, — dedi u.
Bundan tashqari, kompaniya rahbari Rheinmetall yillik artilleriya snaryadlari ishlab chiqarishni 100 dan 600 mingtagacha oshirmoqchiligini ma’lum qildi. Uning so‘zlariga ko‘ra, bu snaryadlarning aksariyati Ukrainaga yetkazilishi rejalashtirilgan.
2023-yil mart oyida Rheinmetall bosh direktori Kiyev bilan Ukrainada zavod qurish bo‘yicha muzokaralar olib borayotganini e’lon qilgandi. O‘shanda yiliga 400 ga yaqin tank ishlab chiqaradigan zavod qurish haqida gap bordi. Kompaniyadagi qurilish qiymati 200 million yevroga baholangan.
Rossiya Xavfsizlik kengashi rahbari o‘rinbosari Dmitriy Medvedev Ukrainada zavod qurilishi haqidagi xabarni “Kiyev rejimining ibtidoiy trolligi” deb atadi. Shunga qaramay, u “agar germaniyaliklar baribir uni qurishga qaror qilsa, Rossiya bu voqeani ‘Kalibr’ va boshqa pirotexnika vositalaridan salyut otib nishonlaydi” deb qo‘shimcha qildi.
Izoh (0)