Германиянинг Rheinmetall концерни яқин 12 ҳафта ичида Украинада зирҳли техникалар (бронотехника) ишлаб чиқарувчи завод очади, деди компания бош директори Армин Паппергер CNN телеканалига берган интервьюсида.
Қайд этилишича, корхона мамлакат ғарбида жойлашади. Rheinmetall заводни Украина давлат мудофаа концерни “Укроборонпром” билан биргаликда бошқаришни режалаштирмоқда. Корхона, шунингдек, украиналик мутахассисларни танклар ва бошқа бронотехникаларга техник хизмат кўрсатиш бўйича ўқитади.
Паппергернинг таъкидлашича, завод Россиянинг эҳтимолий зарбаларидан ҳимоя қилинади.
“Ҳозир Украинада ҳарбий маҳсулотлар ишлаб чиқарадиган кўплаб заводлар мавжуд. Бу шулардан бири бўлади. Биз уни ҳимоя қила оламиз”, — деди у.
Бундан ташқари, компания раҳбари Rheinmetall йиллик артиллерия снарядлари ишлаб чиқаришни 100 дан 600 мингтагача оширмоқчилигини маълум қилди. Унинг сўзларига кўра, бу снарядларнинг аксарияти Украинага етказилиши режалаштирилган.
2023 йил март ойида Rheinmetall бош директори Киев билан Украинада завод қуриш бўйича музокаралар олиб бораётганини эълон қилганди. Ўшанда йилига 400 га яқин танк ишлаб чиқарадиган завод қуриш ҳақида гап борди. Компаниядаги қурилиш қиймати 200 миллион еврога баҳоланган.
Россия Хавфсизлик кенгаши раҳбари ўринбосари Дмитрий Медведев Украинада завод қурилиши ҳақидаги хабарни “Киев режимининг ибтидоий троллиги” деб атади. Шунга қарамай, у “агар германияликлар барибир уни қуришга қарор қилса, Россия бу воқеани ‘Калибр’ ва бошқа пиротехника воситаларидан салют отиб нишонлайди” деб қўшимча қилди.
Изоҳ (0)